İsveç Baltik dənizində Rusiya sualtı qayığını izləyib - ÖZƏL

İsveç Silahlı Qüvvələri Baltik dənizində Rusiya sualtı qayığını müşahidə etdiyini açıqlayıb. Olaylar.az xəbər verir ki, məlumata görə, sualtı qayıq dünən Danimarkanın Böyük Belt boğazı vasitəsilə Baltik dənizinə daxil olub. Silahlı Qüvvələrin bəyanatında bildirilir ki, İsveçin hərbi gəmiləri və qırıcı təyyarələri sualtı qayığı Katteqat boğazında (Danimarka və İsveç arasında yerləşən ərazi) qarşılayaraq hazırda onun hərəkətini izləyirlər. Ordu rəhbərliyi bu əməliyyatı "ittifaqçılarla sıx əməkdaşlıq çərçivəsində həyata keçirilən adi müşahidə əməliyyatı" kimi qiymətləndirib və İsveçin öz ətraf regionunda "yaxşı nəzarət imkanlarına malik olduğunu" vurğulayıb.
İsveçin Baş naziri Ulf Kristersson yanvar ayında bildirmişdi ki, ölkə "nə müharibə, nə də tam sülh vəziyyətində"dir. Onun sözlərinə görə, Baltik dənizi regionu son zamanlar dezinformasiya kampaniyaları və sualtı rabitə kabellərinə zərər vurulması kimi "hibrid hücumlarla" üzləşib.
"Rusiya təhdidi, yəqin ki, uzunmüddətli xarakter daşıyır. Bizim müdafiəmiz də məhz buna uyğun olmalıdır," - deyə Kristersson qeyd edib. Qeyd edək ki, İsveç iki əsrlik neytrallıq siyasətindən imtina edərək 2024-cü ildə NATO-ya qoşulub.