“Bu, daha çox şöhrət arzusuna bənzəyir”

Mayis Səfərli: "Sahibkara arxa durmaq rayon rəhbərliyinin gündəlik fəaliyyətinin ağırlıq mərkəzi olmalıdır"

"Yeni sabah. az saytında "Azərbaycanda icra başçısı kartof yığdı" sərlövhəli yazı diqqətimi çəkdi. Fotolarla illüstrasiya edilən informasiyanın xəbər yükü ondan ibarətdir ki, Masallının icra başçısı məhsul yığan əməkçilərlə görüşüb,onlara koronavirusla mübarizədə diqqətli olmağı tövsiyə edib və kartof toplamağa kömək edib..." Bunu "Olaylar"a deyən Yurddaş Partiyasının sədri Mayis Səfərlinin sözlərinə görə, əslində, vəzifəli şəxsin xalqın içərisinə çıxması normal, hətta, zəruri bir addımdır: "Anormal olan budur ki, bir sıra qulluq sahibləri günlərini rahat kabinetlərdə keçirir, insanları narahat edən problemlərdən uzaq düşürlər. Belələri iş saatları bitən kimi milyonluq malikanələrinə, villalarına, bağ evlərinə tələsir, yaxud özlərinə məxsus restoranlara, əyləncə mərkəzlərinə üz tutub kef məclisləri qururlar. Vəzifə borcu,xalq, insanlar yaddan çıxır".

Onun sözlərinə görə,  hazırda ölkəmizdə vəzifələrindən sui - istifadə edən, xalqın, dövlətin vəsaiti hesabına böyük sərvət toplayanlara qarşı ciddi mübarizə aparılır. Cəmiyyət bu vəziyyətin aradan qaldırılacağına ümid edir. Hamı istəyir ki, tutduğu vəzifənin böyüklüyündən, kiçikliyindən asılı olmayaraq, hər bir hökumət adamı xalq üçün çalışsın, qanunlarla idarə etsin və qanunlarla yaşasın: "Masallının icra başçısının tarlaya gedib məhsul dərənlərə virusla bağlı məsləhət verməsini, bir - iki vedrə kartof yığıb şəkil çəkdirmısini çoxları kimi, mən də birmənalı qarşılamıram. Əvvəla, rayon rəhbərinin maskasız-filansız, məsafə saxlamadan insanlarla təmasa keçməsi və onları pandemiya əleyhinə təhlükəsizlik tədbirlərinə əməl etməyə çağırması elə də inandırıcı və səmimi görünmür. Bir də ki, axı, belə məsələlərdən ötrü uyğun səlahiyyətlərlə görəvləndirilmiş əməkdaşlar var. Bu,daha çox şöhrət arzusuna bənzəyir. Bir çox rayonlarda olduğu kimi, Masallıda da işsizlikdən, kasıbçılıqdan əziyyət çəkən insanlar  kifayət qədərdir. İcra başçısı, bax,bu problemlərin çözülməsi üçün əlindən gələni etməlidir. O, vəzifə səlahiyyətləri çərçivəsində rayonda elə münbit şərait, qanunçuluğun hökm sürdüyü etimad atmosferi yaratmalıdır ki, əslən bu bölgədən olan Rusiyadakı,Ukraynadakı,Türkiyədəki iş adamları, kapital sahibləri həvəslə öz doğma yurdlarına sərmayə yatırsınlar, iş yerləri açsınlar. Yerli imkanları səfərbər etmək, insanlara çörək, iş yeri verən hər bir sahibkara arxa durmaq, dayaq olmaq rayon rəhbərliyinin gündəlik fəaliyyətinin ağırlıq mərkəzi olmalıdır".