"Güclü Ermənistan" partiyasının lideri iqtisadi çöküş barədə xəbərdarlıq edib – ÖZƏL

Olaylar.az xəbər verir ki, "Güclü Ermənistan" partiyasının lideri, iş adamı Samvel Karapetyan sosial şəbəkələrdə yaydığı bəyanatda mövcud hakimiyyətin siyasətini kəskin tənqid edərək, Nikol Paşinyanın növbəti parlament seçkilərində qalib gələcəyi təqdirdə ölkə iqtisadiyyatının tamamilə çökəcəyini və Rusiya ilə iqtisadi müharibə təhlükəsinin yaranacağını bildirib. 

Karapetyan hakimiyyətin Ermənistanı geosiyasi qarşıdurma meydanına çevirdiyini, Rusiya ilə münasibətlərdə qeyri-ağıllı addımlar atıldığını vurğulayaraq, Rusiyanın bölgədən sıxışdırılma cəhdlərini "rüsvayçı davranış" adlandırıb. O xatırladıb ki, Ermənistanın ən dərin iqtisadi əlaqələri məhz Rusiya ilədir; belə ki, bu ölkə Ermənistana ucuz qaz verir, kənd təsərrüfatı məhsullarını alır və minlərlə mövsümi işçi üçün imkanlar yaradır. Karapetyan qeyd edib ki, Paşinyan xalqın rifahını deyil, yalnız qorxu atmosferi yaradaraq hakimiyyətdə qalmağı düşünür və Ermənistanın da Ukrayna və Gürcüstanın taleyini yaşamaması üçün hakimiyyət dəyişikliyinin vacib olduğunu vurğulayıb. Rusiya Prezidenti Vladimir Putinin aprelin 1-də keçirilən görüşdə Ermənistana satılan qazın qiymətinin Avropadakı bazar qiymətlərindən dəfələrlə ucuz olmasını xatırlatması fonunda, Ermənistan parlamentinin spikeri Alen Simonyan isə qazın qiyməti qaldırılacağı təqdirdə ölkənin KTMT və Aİİ-dən çıxa biləcəyini bəyan edib.