Düşük, bayağı verilişlər cəmiyyətimizin mədəni və intellektual səviyyəsinin aşağı düşməsinə səbəb olur
"İTV yayım şurasına seçiləcək dostlarımızı təbrik edirəm. Arzu edirəm ki, onlar ictimai tv-ni daha da baxımlı etsinlər. Ədalət naminə demək lazımdır ki, ictimai tv yüksək səviyyəli efir məkanına çevrilib. Məncə onu regionumuzun, bütöv MDB məkanının ən maraqlı və göz oxşayan efir məkanlarından biri hesab etmək olar. Televiziyanın studiyaları da göz oxşayır, rəng seçimləri şəxsən məni efirə kilidləyir. İTV rəhbərliyini, bütün əməkdaşları və əməyi keçən hər kəsi təbrik edirəm. Gözəl, baxımlı, maraqlı efir məkanı yaratmısınız. Verilişlərinizin hamısı unikaldır və maraqlıdır. Onun üçün də ayrı-ayrı verilişləri də hallandırmaq istəmirəm ki, haqsızılıq etməyim". Olaylar xəbər verir ki, bunu parlamentin bugünkü plenar iclasında Milli Cəbhə Partiyasının (MCP) sədri, deputat Razi Nurullayev deyib. Deputat İTV-də yayımlanan "3D" verilişiniz haqqında danışıb: "İstərdim ki, o ilk zamanlardakı formatına geri dönsün. O verilişin ruhu ciddi ictimai-siyasi deyildi, ciddi fəlsəfi fikirlər məkanı deyildı, o siyasətçilər, ictimai xadimlər üçün şok terapiyası idi və belə də qalmalıdır. Təbii ki, insanların şəxsiyyətinə və mənliyinə toxunmadan. Siz siyasi, ictimai, elmi və digər sahələrdə çəkili insanları dəvət edin. Əgər onlar gəlməsə, narahat olmayın. Yerində başqa bir 3D otursun, suallar verin, cavablar alın. Maraqlı olsun, suallar kəskin olsun, digər verilişlərinizdə müzakirə olunan məsələlərdən tam kənar olsun.
Bütün televiziyalara isə arzum budur ki, bizim efir məkanlarında sağlam tənqid səsləndirən verilişlərin sayı çoxalsın. Yalançı, boğazdan yuxarı təriflər, yaltaqlıq təbliq edən verilişlər, yerli-yersiz təriflər ölkənin inkişafına yox, geriləməsinə səbəb olur. Düşük, bayağı, çığırtı-bağırtı olan verilişlər cəmiyyətimizin mədəni və intellektual səviyyəsinin aşağı düşməsinə səbəb olur. Onun üçün də gərək biz düşünək ki, televiziyalara hansı köməkliyi edək ki, onlar bu cür verilişlər üzərində reytinq qurub pul qazanmasınlar. Razıyam ki, onlara başqa mümkün mənbələrdən pul qazanmağa imkan yaradılsın ki, onlar maliyyə arxasınca düşüb cəmiyyətə lazımsız məlumatlar ötürməsinlər".