Erməni Apostol Kilsəsi keşişin rütbəsini ləğv edib – ÖZƏL

Erməni Apostol Kilsəsi, Aragatsotn vilayətinin Talin şəhərindəki Müqəddəs Tanrı Anası Kilsəsinin keşişi, Yerəmiya Tade Taxmazyanın rütbəsini ləğv edib. 

Olaylar.az xəbər verir ki, bu barədə Eçmiədzin Ana Kürsüsündən məlumat verilib.
Keşişin fəaliyyəti məsələsi daha əvvəl Kilsə Mükafatları və İntizam Komissiyasının gündəliyinə daxil edilmişdi. Buna əsas kimi isə Aragatsotn Yeparxiyasının İnzibati Şurasının məruzəsi və İntizam Komissiyasının rəyi göstərilib.

Taxmazyan, Erməni Kilsəsini və ruhaniləri nüfuzdan salmaqda (o cümlədən böhtan yaymaqla); kilsə əleyhinə hərəkətlər etməkdə, rütbəsi ləğv edilmiş şəxsin (Stepan Asatryan) günahına şərik olmaqla; liturgiya ayini qanununu pozmaqda (Katolikosun adını buraxmaqla); parçalanma hərəkatına qoşulmaqda və kilsə hakimiyyətinə tabe olmamaqda ittiham olunub.
Rütbəsi ləğv edilən keşişə indən belə Aramais Taxmazyan adlı dünyəvi adı qaytarılıb.