Vüqar Rəhimzadə: Azərbaycan bu gün qalib, bütövləşən ölkə olaraq yeni hədəflərə doğru inamla addımlayır

Azərbaycan xalqının çoxəsrlik dövlətçilik tarixinə qızıl hərflərlə həkk olunmuş 8 Noyabr- Zəfər Günü 30 illik işğal dövrünün, 44 günlük Vətən müharibəsinə gedən yolun və əldə edilən şanlı Qələbəmizin fonunda qarşıda dayanan hədəflərin məcmusudur. 27 sentyabr 2020-ci il tarixində başlayan və 44 gün davam edən Vətən müharibəsi  Ermənistanın kapitulyasiyası və Azərbaycanın hərbi-siyasi  Qələbəsi ilə başa çatdı. Bu Zəfər növbəti zəfərlərimizə, Böyük Qayıdışa,  regionda və dünya siyasətində yeniliklərə yol açdı. Bayramlarımız sırasına Zəfər Gününün, Dövlət Suverenliyi Gününün yazılması beynəlxalq hüquqa və milli maraqlara əsaslanan müstəqil siyasətin məntiqi nəticəsi kimi dünya azərbaycanlılarının birliyini və qürurunu  daha da gücləndirdi.

Müasir hərb tarixinə XXI əsrin yeni nəsil müharibəsi kimi daxil olan 44 günlük Vətən müharibəsi Azərbaycan Silahlı Qüvvələrinin yüksək peşəkarlığını, texnoloji üstünlüyünü,  sarsılmaz döyüş ruhunu nümayiş etdirdi. Ordu quruculuğu hər zaman Prezident İlham Əliyevin dövlət siyasətinin prioritet istiqaməti olub. Uzun illər ərzində danışıqlar masasında prinsipiallıq göstərən Azərbaycan, eyni zamanda, güclü ordu yaratdı. Büdcədə hərbi xərclərin artması Silahlı Qüvvələrimizi daha da gücləndirdi. Ordunun döyüş qabiliyyəti möhkəmləndi, Silahlı Qüvvələrimiz müasir silah-sursat, texnika ilə təchiz edildi. Azərbaycanda hərbi sənaye kompleksinin yaradılması ölkənin hərbi qüdrətini artırdı.  

Ölkəmizdə  son illərdə formalaşan və dinamik inkişaf edən hərbi sənaye kompleksi hesabına müxtəlif növ hərbi texnika, zirehli maşınlar, pilotsuz uçuş aparatları, atıcı silahlar istehsal olunur. Hazırda Azərbaycanda mindən çox hərbi təyinatlı məhsul istehsal edilir. Dünyanın aparıcı beynəlxalq sərgilərində hərbi məhsullarımız nümayiş olunur. Azərbaycan Ordusu 44 günlük İkinci Qarabağ müharibəsində tarixi Zəfərimizə qədər dəfələrlə həm işğalçı Ermənistana, həm də onlara dəstək funksiyasını yerinə yetirən bəzi dünya güclərinə  hansı gücə malik olduğunu nümayiş etdirmişdi. 2016-cı ilin Aprel döyüşləri, 2018-ci ilin Günnüt əməliyyatı, 2020-ci ilin Tovuz döyüşləri bunun bariz nümunəsidir. Bütün bu əməliyyatlar 2020-ci ilin Vətən müharibəsində qazanılan tarixi Zəfərin mühüm mərhələləri və ilkin addımları hesab olunur.

Bu fikirləri Milli Məclisin deputatı Vüqar Rəhimzadə mediaya açıqlamasında bildirib.

Milli Məclisin deputatı qeyd edib ki, Azərbaycanın iqtisadi imkanları ordu quruculuğu, ümumiyyətlə, bütün sahələrdə davamlı uğurları şərtləndirir. İqtisadi müstəqilliyimiz ölkəmizin siyasi mövqeyini daha da möhkəmləndirir. Azərbaycanın malik olduğu enerji resurslarından səmərəli istifadə etmək məqsədilə iştirakçısı və təşəbbüsçüsü olduğu beynəlxalq layihələrin uğurlu icrası iqtisadi qüdrətinin artmasında əhəmiyyətli rol oynayır. Bütün regional layihələrdən təcrid olunmuş Ermənistandan fərqli olaraq Azərbaycan transmilli layihələri reallaşdırmaqla regionda tamamilə yeni mənzərə yaratdı. Azərbaycan regionun enerji, nəqliyyat xəritələrini yenidən tərtib etdi. Təşəbbüsləri reallığa çevirən ölkə olaraq  beynəlxalq aləmdə böyük dəstək qazandı.

Tarixi Zəfərimizədək Azərbaycanın keçdiyi inkişaf yoluna nəzər salsaq görərik ki,  qarşıya qoyulan məqsədlərə nail olmaq üçün həm böyük səylər, qətiyyət göstərilib, həm də bütün sahələrdə davamlı uğurlar üçün möhkəm baza formalaşdırılıb. Prezident İlham Əliyevin VII Ümumdünya Mədəniyyətlərarası Dialoq Forumunun açılış mərasimindəki çıxışında  qeyd etdiyi kimi, Azərbaycanda 35 il ərzində əldə olunan bütün nailiyyətlər xalqın öz zəhməti sayəsində mümkün olmuşdur. Biz heç bir beynəlxalq yardım almamışıq. Dağıntılardan, işğaldan, geniş yayılmış yoxsulluqdan tərəqqiyə, inkişafa və uğurlara doğru yol keçmişik. Bu gün Azərbaycanın xarici siyasətinə, iqtisadi göstəricilərinə, qlobal enerji və nəqliyyat bazarlarındakı roluna nəzər salsanız, ölkəmizin rolunun son dərəcə sürətlə artdığını görərsiniz. Azərbaycan qeyri-sabit regionda sabitliyin dayağı kimi qəbul edilir. Eyni zamanda, müstəqil siyasətimiz ölkəmizə böyük hörmət qazandırıb. Beynəlxalq təmaslarımız onu göstərir ki, biz həqiqətən də özümüzü beynəlxalq birliyin etibarlı və hörmətli bir üzvü kimi təqdim edə bilmişik.

Vüqar Rəhimzadə vurğulayıb ki, 44 günlük İkinci Qarabağ müharibəsi şanlı tariximizdir. Dövlət başçısı İlham Əliyev hər zaman çıxışlarında tarixi Zəfərimizdən bəhs edərkən  bu çağırışı da edir ki, ancaq müharibə olmaya bilərdi, əgər Ermənistan və onun rəhbərliyi, onun arxasında dayanan qüvvələr beynəlxalq hüquqa, BMT Təhlükəsizlik Şurasının dörd qətnaməsinə əməl,  əgər böyük dövlətlər Ermənistana onun işğalçılıq siyasətinə görə sanksiyalar tətbiq etsəydilər, heç olmasa, onların işğalçılıq siyasətini pisləsəydilər, bəlkə də müharibəyə ehtiyac qalmazdı. Azərbaycan Prezidenti beynəlxalq təşkilatların tribunasından, müxtəlif mötəbər platformalardan bu çağırışı da edir ki, biz əraziləri işğal altında olan ölkə, ən elementar insan hüquqları daim pozulan xalq kimi əbədi yaşamalı deyildik. Biz danışıqlarda bütün səmimiyyətimizlə və ümidlə iştirak edirdik. Lakin bu prosesin heç bir nəticə vermədiyini gördükdə, özünümüdafiə hüququ da daxil olmaqla, BMT Nizamnaməsində, o cümlədən onun 51-ci maddəsində təsbit edilmiş qanuni hüququmuza əsaslanaraq məsələni həll etdik.

Milli Məclisin deputatı bildirib ki, 2020-ci ilin 27 sentyabr tarixində  Ermənistanın ordusu tərəfindən müxtəlif istiqamətlərdə ordumuzun mövqeləri atəşə tutuldu. Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə qoşunlarımızın bütün cəbhə boyu əks-hücum əməliyyatına başlaması barədə qərar verildi. Azərbaycan xalqı 30 ilə yaxın müddət ərzində Ali Baş Komandanın bu əmrini gözləyirdi. "Dəmir yumruq" əməliyyatının ilk saatlarından cəbhə xəttindən sevindirici xəbərlər gəlməyə başladı. 44 gün ərzində hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, işğala son qoyulsun və tarixi ədalət zəfər çalsın. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Silahlı Qüvvələrimizin sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi.

Vüqar Rəhimzadə qeyd edib ki, noyabrın 8-də Şuşa şəhərinin unikal, sıldırım qayalara dırmanmaqla əlbəyaxa döyüş taktikası ilə  azad edilməsi Ermənistan ordusunun hərbi müqavimətini tamamilə qırdı. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı Qələbəsinin şahidi oldu. Prezident İlham Əliyevin İkinci Qarabağ müharibəsi dövründə xarici mediaya müsahibələrin hər biri Azərbaycanın diplomatik uğuru kimi çağdaş tariximizin şanlı səhifələrinə qızıl hərflərlə yazıldı. Bu müsahibələrdə keçmiş münaqişə ilə bağlı əsl həqiqətlər beynəlxalq ictimaiyyətə çatdırıldı. İnformasiya savaşının əsas konturlarını təşkil edən bu müsahibələr mediamızın fəaliyyətinə istiqamət verdi. Müzəffər Ali Baş Komandanın Vətən müharibəsi dövründəki müsahibələri XXI əsr üçün yeni üslub, yeni model nitq strategiyası hesab edilə bilər. Müsahibələr ardıcıl, dünyanın müxtəlif ölkələrinin telekanalları vasitəsi ilə aparılırdı. Müsahibələri real mübarizə üsuluna çevirən Azərbaycan Prezidenti informasiya müharibəsində də qalib gəldi. Həmin müsahibələrdə gerçəklikdən doğan konkretlik, qətiyyət, iradə əsaslı şəkildə yer alırdı. Müzəffər Ali Baş Komandan müsahibələrlə münaqişə ilə bağlı dünyanın fikrini dəyişdirməyə müvəffəq oldu.

Millət vəkili bildirib ki, şübhəsiz tarixi Zəfərimizə gedən yolun, həmçinin son 6 ilin reallıqlarını bir yazıda əhatə etmək qeyri-mümkündür.  Postmünaqişə dövrü Azərbaycanın iqtisadi potensialını və yenidənqurma qüdrətini nümayiş etdirir. Hazırda Qarabağ və Şərqi Zəngəzur iqtisadi rayonlarında nəhəng infrastruktur layihələri icra olunmaqdadır. "Ağıllı şəhər" və "ağıllı kənd" konsepsiyaları əsasında yaşayış məntəqələrinin hər biri  sıfırdan qurulur. Dövlət başçısı İlham Əliyevin və birinci xanım Mehriban Əliyevanın  azad edilmiş ərazilərimizə çoxsaylı səfərlərinin hər biri Böyük Qayıdış Proqramının uğurlu icrasını təmin edən mühüm addımlarla zəngindir. Yeni sosial obyektlərin açılışı, eyni zamanda, təməlqoyma mərasimləri keçirilir. Ölkə Prezidentinin  bu torpaqlara qayıdan sakinlərlə görüşləri onlara torpaq həsrətinin bitməsinin, bu ərazilərin cənnət məkana çevrilərək yeni həyatın başlamasının sevincini yaşadır.  2026-cı il oktyabrın 23-nə qədər işğaldan azad edilmiş ərazilərin bərpa olunmuş yaşayış məntəqələrinə 40922 nəfərdən ibarət 10114 ailənin qayıdışı təmin edilib. İşğaldan azad olunmuş ərazilərə bu günə qədər 47 yaşayış məntəqəsinə, yəni 10 şəhər, 3 qəsəbə və 34 kəndə keçmiş məcburi köçkünlərin qayıdışı təmin edilib. Qarabağ Universitetində 3000 mindən çox tələbə təhsil alır. Ümumilikdə azad edilmiş ərazilərdə hazırda 100 minə yaxın insan yaşayır, çalışır və təhsil alır. Bu qısa zamanda Füzuli, Zəngilan və Laçın Beynəlxalq Hava limanlarının  tikilib istifadəyə verilməsi bu ərazilərin strateji əhəmiyyətini təsdiqləyir. Bu bölgə  qlobal nəqliyyat qovşağına çevrilib. İşğaldan azad edilmiş ərazilərdə Zəfər və İşğal muzeylərinin inşası, tarixi-dini abidələrin bərpası  ilə mədəni irsin dirçəldilməsi əsas hədəflər sırasındadır. Prezident İlham Əliyevin təşəbbüsü ilə  açıq səma altında salınan  Hərbi Qənimətlər Parkının 2021-ci ilin  aprelində açılışı oldu. Parkda eksponatlar arasında Silahlı Qüvvələrimizin işğaldan azad olunan ərazilərdə ermənilərdən qənimət götürdüyü 2 mindən çox hərbi avtomobilin nömrə nişanlarından hazırlanan və üzərində "Qarabağ Azərbaycandır!" şüarı əks olunan kompozisiya, Ermənistan tərəfindən törədilən müharibə cinayətləri, o cümlədən döyüş bölgəsindən uzaq olan ərazilərimizin raket zərbələrinə məruz qalması, dinc sakinlərin qətlə yetirilməsi və yaralanması barədə faktlar, düşmən tərəfindən Azərbaycan ərazisinə atılmış "İsgəndər-M" raketinin qalıqları var.

Vüqar Rəhimzadə qeyd edib ki, Azərbaycanın Zəfəri təkcə ərazi bütövlüyünün bərpası deyil, həm də Cənubi Qafqazda uzunmüddətli sülh, sabitlik və əməkdaşlıq platformasının yaradılması üçün tarixi imkandır. Dövlət başçısı, Müzəffər Ali Baş Komandan İlham Əliyevin böyük qətiyyəti, səyləri, şəhidlərimizin qanı və canı bahasına, qazilərimizin rəşadəti ilə qazanılan bu şanlı Qələbə Azərbaycan xalqının birlik və həmrəyliyinin ən ali təzahürüdür. Tarixi Zəfərimizin ardınca 2023-cü ilin sentyabrında suverenliyimizin  tam bərpasının sevincini yaşadıq. Yeni dövrə qədəm qoyan Azərbaycan bu gün qalib, bütövləşən ölkə olaraq yeni-yeni hədəflərə doğru inamla addımlayır. Zəfərlərimiz milli ruhun təntənəsi, azərbaycançılıq ideologiyasının sarsılmazlığının sübutudur.