Paşinyan Qarabağla bağlı şok sənədlər yaydı – Köçəryandan cavab gəldi

Ermənistanın ikinci prezidenti Robert Köçəryanın ofisi Baş nazir Nikol Paşinyanın Qarabağ danışıqları ilə bağlı dərc etdiyi materiallara reaksiya verib.

Globalinfo.az xəbər verir ki, Ermənistan hökuməti Qarabağla bağlı danışıqların 2020-ci ilə qədər aparıldığı sənədləri dərc edib.

Nazirlər Kabinetinin saytında on üç fayl yerləşdirilib. Sənədlərdə 2011-ci ildə Kazanda müzakirə edilən layihə, vasitəçilərin 2019-cu ildən etdikləri təkliflər, üçüncü prezident Serj Sarkisyanın 2016-cı ilin avqust ayından Rusiya prezidenti Vladimir Putinə yazdığı məktubu və bir sıra digər materiallar əksini tapıb.

Köçəryanın ofisinin rəhbəri Baqrat Mikoyan qeyd edib ki, ən son dərc olunmuş sənəd - vasitəçilərin 2019-cu il təkliflər paketi  vəziyyəti tam şəkildə aydınlaşdırır. Baş nazir Ermənistan tərəfi üçün əlverişli olan təklifi rədd edib və bu, ağır nəticələrə səbəb olub. Mikoyanın qeyd etdiyi kimi, təkliflərə Ermənistan tərəfi üçün nisbətən əlverişli olan bir sıra müddəalar daxil olub.

Bundan əlavə, bildirilir ki, Paşinyan danışıqlar prosesinin bir hissəsi olaraq "Haykakan Jamanak" qəzetində bir sənəd təqdim edib. Bu, Ermənistanın Meğri bölgəsinin Qarabağla dəyişdirilməsindən bəhs edir. Mikoyanın sözlərinə görə, belə bir sənəd danışıqlar masasında heç vaxt mövcud olmayıb.

Baş nazirin əleyhdarları dəfələrlə sənədlərin ictimaiyyətə açıqlanmasına çağırıblar və iddia edirlər ki, sənədlərdə Qarabağın Azərbaycanın tərkibində qalması ilə bağlı heç bir müddəa yoxdur.