İsveçrə münaqişə zonalarına silah ixracı qadağasını yumşaldır- ÖZƏL

İsveçrə Milli Şurası (parlamentin aşağı palatası) münaqişə zonalarına silah və hərbi avadanlıq ixracını qadağan edən qanunun yumşaldılmasına dair dəyişiklikləri təsdiqləyib. Qanun layihəsi indi Kantonlar Şurasına təqdim olunacaq və böyük ehtimalla referendumda səsverməyə çıxarılacaq.
Olaylar.az xəbər verir ki, məlumata görə, Milli Şura dəyişiklikləri 120 lehinə, 63 əleyhinə səslə, 12 bitərəf olmaqla qəbul edib. Yeni qaydalara əsasən, İsveçrədən silah və digər hərbi material alan 25 Qərb ölkəsi əvvəlkindən daha geniş azadlıqlara malik olacaq. Həmin ölkələr hərbi əməliyyatlarda iştirak etsə belə, İsveçrə onlara silah satışına icazə verə biləcək.
Bununla belə, insan haqlarını sistematik və ciddi şəkildə pozan dövlətlər bu istisnalardan yararlana bilməyəcək. Həmçinin İsveçrə hökuməti istənilən hərbi ixrac qərarına veto qoymaq hüququnu qoruyub saxlayır. Bu veto ölkənin neytrallığını riskə ata biləcək halların qarşısını almağı hədəfləyir.