Rusiya səfiri: Ermənistanın Aİ-yə üzvlüyü hipotetik, Aİİ-də iştirakı isə realdır – ÖZƏL

Ermənistan hakimiyyəti Avrasiya İqtisadi İttifaqında iştirakda maraqlıdır və Moskva bu istiqamətdə İrəvana dəstək verməyə hazırdır. 

Olaylar.az xəbər verir ki, bu barədə Rusiya səfiri Sergey Kopyrkin Sputnik Ermənistan radiosunun "Abovyan Time" verilişində bildirib.

Diplomat qeyd edib ki, Aİİ üzvlüyü Ermənistana real fayda gətirir, Avropa İttifaqına üzvlük perspektivləri isə olduqca qeyri-müəyyəndir. Onun sözlərinə görə, Aİ-yə üzvlük mürəkkəb və uzunmüddətli prosedurlardan ibarətdir, bəzi ölkələr bu prosesdə onilliklərlə gözləməli olurlar. Buna görə də, Kopyrkinin fikrincə, Aİ-yə üzvlük məsələsi Ermənistan üçün hələlik yalnız nəzəri xarakter daşıyır.

"Aİİ isə reallıqdır. Ermənistan bu ittifaqda ən çox fayda əldə edən ölkələrdən biridir və indiyədək rəsmi İrəvan Avrasiya inteqrasiyası layihəsinə maraqlı yanaşır. Biz bu mövqeyi yüksək qiymətləndiririk və hər zaman sıx əməkdaşlığa, dəstək göstərməyə hazırıq. Bu, Ermənistanın Aİİ-dəki son sədrliyi dövründə də belə olub," - deyə səfir vurğulayıb.

Kopyrkin qeyd edib ki, Aİİ iştirakçı ölkələrə iqtisadi maraqlarını reallaşdırmaq üçün geniş imkanlar yaradır. Bu birlik ticarət, əmək miqrasiyası, əmək bazarı, malların, kapitalın və işçi qüvvəsinin sərbəst hərəkətini təmin edən mexanizmlərə əsaslanır.

Diplomat əlavə edib ki, EƏT dinamik inkişaf edən, üzv ölkələrin səsini nəzərə alan bir platformadır və bu baxımdan uğurlu və perspektivli layihə sayılır.

Xatırladaq ki, Ermənistanda EƏT-dən çıxışla bağlı müzakirələr 26 mart 2025-ci ildə parlamentin ölkənin Avropa İttifaqına üzvlüyü ilə bağlı qanun layihəsini təsdiqləməsindən sonra başlanıb. Lakin Avropa İttifaqı hələlik Ermənistana üzvlük təklifi təqdim etməyib və müxalifət bu sənədi "hüquqi cəhətdən absurddur" adlandırıb.