Çinin neft şirkətləri Rusiya neftindən imtina edir: Qazaxıstanın tranzit gəlirləri təhlükə altında – ÖZƏL

Çinin ən böyük dövlət neft şirkətlərinin ABŞ-nin "Rosneft" və "LUKOIL"a tətbiq etdiyi sanksiyalara görə Rusiyadan xam neft alışından imtina etməsi səbəbindən Qazaxıstanın Rusiya neftinin tranzitindən əldə etdiyi gəlirlər azala bilər. 

Olaylar.az xəbər verir ki, bu barədə "ArbatMedia" məlumat yayıb.

"PetroChina", "Sinopec", "CNOOC" və "Zhenhua Oil" şirkətləri təkrar sanksiyalardan ehtiyatlanaraq Rusiya təchizatçıları ilə yeni müqavilələrdən müvəqqəti olaraq imtina etmək qərarına gəliblər. Bu qərar dəniz təchizatına təsir etsə də, Qazaxıstandan keçən boru kəməri marşrutlarına da təsir göstərə bilər.

"Rosneft" hər il "Priırtışsk-Atasu-Aləşankou" marşrutu ilə Qazaxıstandan Çinə təxminən 10 milyon ton neft ixrac edir. 2025-ci ilin sentyabr ayında Rusiya Federasiyasının energetika naziri Sergey Tsivilyov Çinli tərəfdaşlarla təchizatın illik 2,5 milyon ton artırılması barədə razılığa gəlindiyini açıqlamışdı. Lakin mövcud şərtlər daxilində bu planların həyata keçirilməsi təxirə salına bilər.

Qazaxıstanın Energetika naziri Almasadam Satkaliyevin sözlərinə görə, Rusiya neftinin Çinə tranziti ölkəyə ildə təxminən 170 milyon dollar, Pavlodar Neft-Kimya Zavodunun yüklənməsi nəzərə alındıqda isə 180 milyon dollara qədər gəlir gətirir. Alışların dayandırılması ölkənin gəlirliliyinə təsir edə bilər.
Çin hər gün təxminən 1,4 milyon barel Rusiya nefti idxal edir. Bu tədarüklərin əhəmiyyətli bir hissəsi kiçik özəl şirkətlər də daxil olmaqla, müstəqil neft emalı zavodlarının payına düşür.

Treyderlərin dediyinə görə, müstəqil neft emalı zavodları da yeni məhdudiyyətlərin nəticələrini qiymətləndirmək üçün alışları dayandırmağı planlaşdırırlar. Lakin gələcəkdə onlar idxalı bərpa etməyə ümid edirlər.