Kilikiya Katolikosu: Ermənistan durğunluqdan çıxmaq üçün yeni idarəçilərə ehtiyac duyur – ÖZƏL

Olaylar.az xəbər verir ki, Kilikiya Böyük Evinin Katolikosu I Aram taxta çıxmasının 30-cu ildönümü münasibətilə keçirilən tədbirdə çıxış edərək Ermənistanı durğunluq və tənəzzül vəziyyətindən çıxarmaq üçün yeni yanaşmalara və yeni idarəçilərə ehtiyac olduğunu bildirib.

Katolikos qeyd edib ki, Ermənistan özünü məhvə, Diaspora isə özünü süquta aparır. O, erməni xalqının birləşərək bunun qarşısını almalı olduğuna əmindir.
I Aram vurğulayıb: "Mövcud şəraitdə bizə yeni idarəçilər, yeni yanaşmalar və baxışlar lazımdır. Keçmişi təkrarlamaqla irəli gedə bilmərik, xüsusilə də hər gün baş verən dəyişikliklər və sarsıntılar şəraitində." 

O, həmçinin yaranmış vəziyyətin aradan qaldırılmasında Diasporanın xüsusi rolunu qeyd edib.

Qeyd edək ki, daha əvvəl Kilikiya Katolikosu I Aramın taxta çıxmasının 30 illiyi münasibətilə nəşr edilmiş kitabı Ermənistanın Baş naziri Nikol Paşinyana hədiyyə etməsi sosial şəbəkə istifadəçiləri arasında narazılıq doğurmuşdu. Bununla yanaşı, Arame I Baş nazirə Erməni Həvari Kilsəsi (EHK) ətrafında baş verənlərlə bağlı narahatlığını da çatdırmışdı.

Xatırladaq ki, Baş nazir Paşinyanın ali ruhaniləri tənqid etdiyi sərt bəyanatlarından sonra Ermənistan hakimiyyəti ilə EHK arasında qarşıdurma daha da kəskinləşib. Paşinyan Ümumdünya Ermənilərinin Katolikosunun seçilmə qaydasını dəyişdirməyi təklif edərək bu prosesdə dövlətin əsas rolunu nəzərdə tutub. Həmçinin, EHK və hakimiyyət arasında yaranan qarşıdurmadan sonra bir sıra yüksək rütbəli ruhanilər həbs olunub və ya onlara qarşı cinayət işi açılıb.