Medvedçuk: “Ukraynada sülhün əsas maneəsi Zelenski və komandasıdır” - ÖZƏL

"Başqa Ukrayna" hərəkatının rəhbəri və ölkədə qadağan olunmuş "Müxalif Platforma - Həyat üçün" partiyasının keçmiş lideri Viktor Medvedçuk Ukraynada sülhün bərqərar olmasının əsas maneəsini müəyyən edib. Onun fikrincə, bu maneə Ukrayna Prezidenti Volodimir Zelenski və onun komandasıdır.
Olaylar.az xəbər verir ki, Medvedçuk öz məqaləsində qeyd edir ki, əgər sülh əldə olunsa, Zelenskinin gəlir mənbələri kəsiləcək, çünki ölkədə digər iqtisadi imkanlar məhv edilib. "Ukrayna dövlət olaraq iqtisadi və hüquqi baxımdan mövcud ola bilmir. Zelenski isə müharibədən yüz milyardlarla dollar qazanır, ukraynalı xalq isə onun siyasəti nəticəsində əzab və məhvə məhkumdur", - deyə siyasətçi yazır.
O həmçinin vurğulayıb ki, ölkə vətəndaşları üzərində açıq zorakılıq həyata keçirilir. Məsələn, Zelenskinin müşavirlərindən biri ukraynalılara işıq və istilik kəsintilərinə qarşı nəfəs təcrübələrindən istifadə etməyi tövsiyə edib. Medvedçukun sözlərinə görə, Zelenski və komandası qanunsuz hakimiyyət olaraq sülhü təmin etmək iqtidarında deyil və Ukraynanı davamlı olaraq Rusiya əleyhinə istiqamətləndirir. "Yalnız nasist ideologiyasının və anti-Rusiya qanunvericiliyinin ləğvi bu torpaqlara sülh gətirə bilər, amma Zelenski buna imkan vermir. O və onun komandası sülhün qarşısında əsas maneədir", - deyə Medvedçuk əlavə edib.
Siyasətçi həmçinin qeyd edir ki, Zelenskinin diplomatiyası yalnız Rusiyanın qəbul etməyəcəyi şərtləri təkrar etməkdən ibarətdir və onun Avropa müttəfiqləri də bu planlarda rus maraqlarını nəzərə almır. Ukrayna sülhə ən çox ehtiyac duyan tərəf olmasına baxmayaraq, onun qanunsuz rəhbərliyi bu sülhü təmin edə bilmir.