NATO-nun satınalma agentliyində korrupsiya qalmaqalı: milyardlarla avroluq müqavilələr istintaq altındadır - ÖZƏL

Olaylar.az xəbər verir ki, Le Soir qəzetinin məlumatına görə, NATO-nun Təchizat və Satınalmalar Agentliyində (NSPA) mümkün korrupsiya halları ilə bağlı istintaq fonunda ciddi daxili gərginliklər yaşanır. Agentliyin rəhbəri Steysi Kammings 17 oktyabrda alyans üzvü olan dövlətlərə "iri miqyaslı fırıldaqçılıq halları"nın aşkar edilə biləcəyi barədə xəbərdarlıq edib. Lüksemburqda yerləşən NSPA NATO və onun müttəfiqlərinə logistik dəstək göstərir, həmçinin silah, sursat və digər hərbi materialların satın alınmasına cavabdeh mərkəzi qurum kimi fəaliyyət göstərir. 2024-cü ildə agentlik 7,4 milyard avro dəyərində müqavilələri idarə edib. Le Soir yazır ki, 2025-ci maliyyə ilinin sonunadək bu məbləğin 9,5 milyard avroya çatacağı gözlənilir.
Qəzetin məlumatına görə, agentliyin kadrlar direktoru Jenevyev Maşen baş katib Mark Ruttenin adına məktub göndərərək, istintaqda təkrarlanan soyadlara və mümkün sui-istifadə hallarına diqqət çəkib. O, həmçinin rəhbərliyin daxili yoxlamaların aparılmasına mane olduğunu iddia edib. Ardınca Maşen vəzifəsindən kənarlaşdırılıb və onun müqaviləsinin uzadılmaması qərara alınıb. Qeyd olunur ki, bu, uzadılmayan yeganə müqavilə deyil. May ayında Belçika polisi NATO-nun hərbi satınalmaları ilə bağlı korrupsiya işi üzrə iki nəfəri saxlayıb. Bu həbslər Belçika, Lüksemburq, Niderland və İspaniyada aparılan beynəlxalq istintaqın tərkib hissəsidir. İttihamlar arasında NATO-nun hərbi tenderləri ilə bağlı məxfi məlumatların sızdırılması və bu məlumatların alyansın podratçı şirkətlərinə ötürülməsi yer alır.
Belçika Prokurorluğu bildirib ki, işdə agentliyin bir neçə əməkdaşı da iştirak edə bilər. NATO-nun mətbuat xidməti məlumatı təsdiqləyərək, təşkilatın "istintaqla sıx əməkdaşlıq etdiyini" və müxtəlif ölkələrdə "bir neçə şübhəlinin saxlanıldığını" açıqlayıb.