Fransa İsrailin Rəfaha hücumunu pislədi – Bəyanat

Fransa Xarici İşlər Nazirliyi İsrail ordusunun mayın 7-də Rəfah şəhərinə başlayan quru işğalını pisləyən bəyanat yayıb.

Olaylar xəbər verir ki, bəyanatda bu hücumun Qəzzanın mülki əhalisi üçün fəlakətli vəziyyət təhlükəsi yarada biləcəyi vurğulanıb.

"Biz İsrail hakimiyyətini bu hərbi əməliyyatı dərhal dayandırmağa, girovların azad edilməsinə və davamlı atəşkəsə aparan yeganə mümkün yol olan danışıqlar yoluna qayıtmağa çağırırıq", - Fransa Xarici İşlər Nazirliyinin bəyanatında deyilir.

Fransa həmçinin İsraili Rəfah keçidini dərhal açmağa çağırıb ki, bu da həm humanitar yardımın mülki şəxslərə çatması, həm də ən həssas insanların Qəzza zolağından çıxmasına imkan vermək üçün lazımdır. (Axar)