Jurnalistlər Gəncədə beynəlxalq elmi konfrans keçirəcəklər
Bu ilin sentyabrında Gəncədə jurnalistlərin təşəbbüsü ilə geniş beynəlxalq elmi konfrans keçiriləcək. Bu barədə Parlament Jurnalistləri Birliyinin Gəncədə Azərbaycan Dövlət Aqrar Universitetində (ADAU) keçirdiyi görüşdə razılıq əldə olunub.
Bu ilin sentyabrında Gəncədə jurnalistlərin təşəbbüsü ilə geniş beynəlxalq elmi konfrans keçiriləcək. Bu barədə Parlament Jurnalistləri Birliyinin Gəncədə Azərbaycan Dövlət Aqrar Universitetində (ADAU) keçirdiyi görüşdə razılıq əldə olunub.
PJB-dən "Olaylar"a verilən məlumata görə, ADAU-da təşkil olunan görüş Azərbaycan Xalq Cümhuriyyətinin 100 illik yubileyinə həsr olunub. Görüş iştirakçılarına Parlament (Tərəfsiz) Jurnalistlər Birliyinin icra etdiyi layihə haqqında məlumat verilib. Qurumun sədri Elşad Eyvazlı qeyd edib ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyilə keçirilən layihədə AXC ilə bağlı silsilə araşdırma yazıların dərci, həmin yazılardan ibarət kitabın nəşri nəzərdə tutulub. Layihənin bir komponenti isə ölkənin bir sıra aparıcı jurnalistlərinin AXC-nin fəaliyyət göstərdiyi məkanlara ziyarəti ilə əlaqədardır. Artıq PJB üzvlərinin Tbilisiyə səfəri baş tutub. Növbəti ziyarətin Gəncəyə olması təsadüfi deyil: "Çünki Gəncə dövrü AXC hakimiyyətinin mühüm bir hissəsini təşkil edir. Bu, bizim şərəf tariximizdir. AXC qurucularının işləri heç vaxt unudulmayacaq. Bu gün Azərbaycan dövləti onların xatirəsinin daim yaşadılmasına xüsusi diqqət yetirir. Amma bu, yalnız dövlətin işi deyil, bu məsələdə hər bir vətəndaşın, o cümlədən jurnalistlərin də üzərinə yük düşür".
Görüş zamanı ADAU-nun rektoru İbrahim Cəfərov Gəncənin AXC hakimiyyətinin əsas fəaliyyət məkanı adlandırıb. O, AXC yaradıcılarının Gəncədəki 3 aylıq fəaliyyətini cümhuriyyət tarixinin zirvə dövrü kimi qiymətləndirib: "Bu şəxslər təkcə Gəncədəki 3 ay içində insan ömrünə sığmayacaq dərəcədə işlər görüblər, çox mühüm qərarlar veriblər. Onların qarşısında yalnız baş əyməliyik. Bakıda döyüş getdiyi zaman bu şəxslər çəkinmədən işlərini görüblər, dünyaya çıxıblar, dövləti tanıdıblar. Cümhuriyyət qurucuları arasında gəncəlilər də çox olub. Biz çox böyük qürur duyuruq ki, universitetin inzibati binası məhz AXC-nin fəaliyyət göstərdiyi binada yerləşir". Rektor İ.Cəfərov qeyd edib ki, bu bina gələcəkdə hər bir kəs, uşaq, böyük üçün ziyarətgaha çevrilməlidir, məktəbə gedən də, evlənən də məhz bu binanı ziyarət etməlidir. Görüşün sonunda jurnalistlər və tələbələrin iştirakı ilə sentyabrda AXC-nin 100 illik yubileyinə həsr olunmuş geniş beynəlxalq elmi konfransın təşkili haqqında razılıq əldə olunub.