OCCRP-in hazırladığı qeyri-peşəkar və qeyri-ciddi hesabat

Xəbər verdiyimiz kimi 2017-ci il sentyabrın 4-də Mütəşəkkil Cinayətkarlıq və Korrupsiya Hesabatı layihəsi tərəfindən ölkəmiz barədə qərəzli yazı hazırlanıb. Eyni zamanda, bu yazıya istinadən "BBC News” saytında 2017-ci il sentyabrın 5-də "Azərbaycan - 3 milyard dollar dəyərində gizli çirkli fondu idarə edib” başlıqlı və "Guardian” qəzetində bu məsələ ilə bağlı məqalə dərc edilib.

Xəbər verdiyimiz kimi 2017-ci il sentyabrın 4-də Mütəşəkkil Cinayətkarlıq və Korrupsiya Hesabatı layihəsi tərəfindən ölkəmiz barədə qərəzli yazı hazırlanıb. Eyni zamanda, bu yazıya istinadən "BBC News" saytında 2017-ci il sentyabrın 5-də "Azərbaycan - 3 milyard dollar dəyərində gizli çirkli fondu idarə edib" başlıqlı və "Guardian" qəzetində bu məsələ ilə bağlı məqalə dərc edilib. Məsələyə münasibət bildirən QHT sədri, internet-media ekspert Səbuhi Abbasov budəfəki sifarişli hücumun qeyri-peşəkar və bəlli məqsədlərə xidmət etdiyini dedi: "The Organized Crime and Corruption Reporting Project" (OCCRP)təşkilatının hazırladığı "hesabat" qeyri-peşəkar və qərəzlidir. Bunu qurumun rəsmi facebook səhifəsinə daxil olanda görmək mümkündür. Adını beynəlxalq, demokratik təsisat kimi təqdim edən təşkilat rəsmi səhifəsində ana fotonu, son bir neçə günlük fəaliyyətini tamamilə Azərbaycana həsr edib. Bu bilavasitə beynəlxalq səviyyədə reketçilik fəaliyyətidir. Burada açıq şəkildə iki məqamı görmək mümkündür: 1-ci məqam qurumun idarəçiliyində ermənilərin olması və erməni lobbisi tərəfindən maliyyələşmə, 2-ci məqam isə beynəlxalq reketçilik fəaliyyəti. Görünən odur ki, bu təşkilat 2 faktorun "gücündən" istifadə edərək ölkəmizin beynəlxalq aləmdəki imicinə ciddi şəkildə xələl gətirmək niyyətində olublar. Ancaq bugün dünya uydurmalarla deyil, reallıqlarla hesablaşır. İlham Əliyev nəinki regionda, bütün dünyada ilk sıralarda qərarlaşan peşəkar siyasətçilərdəndir. Dünyanın bir sıra siyasi gərginliklərinin çözülməsində İlham Əliyevin siyasi nüfuzundan tez-tez istifadə olunur. Bundan başqa ölkəmizdə aparılan iqtisadi islahatlar, tarazlaşdırılmış siyasi manevrlər erməni lobbisini ciddi şəkildə təşvişə salıb. Ermənistan-Azərbaycan Dağlıq Qarabağ münaqişəsində birincinin işğalçılıq siyasəti bu ölkəni tamamilə məhvə sürükləyib. Ermənistan dövrünün ən acınacaqlı günlərini yaşayır: iqtisadi blokada, siyasi gərginlik, demoqrafik böhran, mədəni çöküş bu ölkəni uçuruma aparır. Ermənilərin bugün əllərində olan yeganə güc lobbilərinin informasiya alətidir. Lobbi təşkilatları əllərində olan mövcud maliyyə imkanlarından istifadə edərək Avropada, Birləşmiş Ştatlarda olan bütün "əldəqayırma", satılmış təşkilatlara ölkəmizlə bağlı qərəzli sifarişlər verirlər. Hesab edirəm sifarişlərdə əsas hədəf kimi ölkə başçısı və onun ailəsinin göstərilməsi təsadüfi deyil. Məsələ burasındadır ki, 1-ci Vitse-prezident Mehriban Əliyevanın son bir neçə ayda həyata keçirdiyi islahatlar dünyada baş verən yeniliklərə adekvat şəkildə həyata keçirilir. Görünən odur ki, bu siyasətin ölkəmizi hansı uğurlara aparacağını erməni lobbisi çox gözəl dərk edib. Lakin əvvəlkindən fərqli olaraq öz qəzəblərini, kinlərini hesabata töküblər. Məhz buna görə hesabat qeyri-peşəkar və yumşaq desək dünya üçün qeyri-ciddidir".

Politoloq Ramiz Alıyev bildirib ki, bir qayda olaraq bu kimi antiAzərbaycan kampaniyasının arxasında hər zaman erməni lobbisi dayanıb: "Sirr deyil ki, "The Organized Crime and Corruption Reporting Project" (OCCRP) təşkilatının "hesabat" hazırlaması zamanı məhz erməni lobbisinin maliyyə yardımı rol oynayıb. Bu arada bir məqama da diqqət çəkmək istərdim. Belə ki, Avropada fəaliyyət göstərən bəzi Azərbaycan diaspor təşkilatlarının apardığı araşdırmalar nəticəsində məlum olub ki, ölkəmizlə bağlı hazırlanan həmin "hesabat"ın müəlliflərinin bir çoxu məhz ermənilərdir. Deməli, hər şey aydındır. Təbii ki, erməninin hazırladığı hesabatda, yaxud erməni lobbisinin maddi dəstəyi ilə hazırlanan hansısa bir sənəddə Azərbaycan barədə tərif əksini tapmaz, ölkəmizdə həyata keçirilən islahatlar, siyasi və hüquqi sahədə atılan addımlar təqdir olunmaz". Ramiz Alıyev onu da qeyd edib ki, bu kimi kampaniyalar müntəzəm olaraq ölkəmizə qarşı həyata keçirilir və bu dəfəki kampaniyanın indiki dövrə təsadüf etməsinin başlıca səbəbi bəllidir: "Məlum olduğu kimi gələn il ölkədə prezident seçkiləri keçiriləcək və həmin seçkilərdə də Azərbaycan cəmiyyətinin hazırkı dövlət başçısı İlham Əliyevi dəstəkləyəcəyi şübhəsizdir. Ona görə də istər Ermənistan dövləti, istər erməni lobbisi, istərsə də işğalçı ölkəyə himayədarlıq edən dövlətlər, təsisatlar dəqiq bilirlər ki, İlham Əliyev Azərbaycan dövlətinə rəhbərlik etdiyi müddətcə Ermənistana rahatlıq olmayacaq. Bu səbəbdən müxtəlif üsul və vasitələrdən istifadə etməklə İlham Əliyevin nüfuzuna zərbə vurmağa çalışırlar. Ancaq qətiyyətlə deyə bilərik ki, bütün bu cəhdlərin heç bir nəticəsi olmayacaq. Necə ki, indiyə qədər Azərbaycana qarşı aparılan kampaniyalar sabun köpüyü effekti verərək heç bir nəticəyə çatmayıb, bu dəfə də eyni proses təkrarlanacaq". Politoloq dünyaya demokratiya dərsi keçmək istəyən, özlərini insan hüquq və azadlıqlarının müdafiəçisi kimi təqdim edən bir sıra dövlətlər, Qərb və Avropa təsissatları, institutlarının erməni lobbisinin maşasına çevrilməsindən təəssüfləndiyini diqqətə çatdırıb. Bildirib ki, bu kimi mənfi tendensiyalar həmin ölkə və təşkilatlara olan etibarı, inamı itirir, onlar barədə qeyri-ciddi imic formalaşır".

Füzuli