Vətəndaşlıqdan imtina və hakimiyyət iddiası: Karapetyanın şansları nə qədər realdır? ÖZƏL

Ermənistanda ev dustaqlığında olan milyarder Samvel Karapetyan Rusiya və Kipr vətəndaşlığından imtina prosesinə başladığını elan edib. "Güclü Ermənistan" partiyasının lideri iyunun 7-də keçiriləcək parlament seçkilərinə qatılmaq üçün bu addımı atıb (ölkə qanunları namizədlər üçün ikili vətəndaşlığı qadağan edir). Analitiklər Karapetyanın bu gedişini Ruben Vardanyanın uğursuz taleyi ilə müqayisə edir və Moskvanın İrəvandakı hakimiyyət dəyişikliyi üçün "düyməyə basdığını" vurğulayırlar.
Mövzu ilə bağlı politoloq Tural İrfan Olaylar.az-a açıqlama verib:
" Karapetyanın Rusiya və Kipr vətəndaşlığından imtina etməsi və seçkilərdə iştirakının mümkünlüyü hələ sual altındadır. Ermənistan hakimiyyəti buna nə dərəcədə rəvac verəcək, hələ məlum deyil. Lakin bütün hallarda sözü gedən şəxsin Ermənistanda kifayət qədər nüfuza və dəstəyə sahib olmaması məlumdur. Belə olduğu halda Rusiya onu yalnız seçki deyil, çevriliş nəticəsində hakimiyyətə gətirə bilər ki, bu da hazırda real görünmür. Çünki Ermənistan hakimiyyəti hazırda Qərb tərəfindən diqqət mərkəzindədir və hakimiyyətin özü də sülhdən sonra yerini bərkidib. Lap iyunda keçiriləcək seçkilərdə Karapetyan iştirak etsə belə, Paşinyan üçün real rəqib olmaq gücündə deyil. Lakin Rusiya vasitəsi ilə, Ermənistandakı əlaltılarının əli ilə pozuculuq təhlükəsi yarada, kütləvi etirazlar kimi xaosa cəhd edə bilər. Bu da vəziyyəti gərginlik həddinə çatdırıb hakimiyyəti dəyişə bilməsələr belə Rusiyanın müəyyən maraqlarını diktə etmək üçün zəmin naminə edilə bilər. Bütün hallarda Paşinyan hakimiyyəti bu ehtimalları düşünür və əgər Karapetyanın ciddi problem yaratmaq ehtimalı olarsa onun ümumiyyətlə seçkidə iştirakına imkan yaratmaya bilər".

Zeynəb Mustafazadə