ABŞ İranın enerji infrastrukturuna hərbi zərbələri dayandırır - Tramp
ABŞ İranın enerji infrastrukturuna hərbi zərbələri dayandırır.
Olaylar.az xəbər verir ki, bu barədə ABŞ prezidenti Donald Tramp "Truth Social"da yazıb.
"Məmnuniyyətlə bildirirəm ki, Amerika Birləşmiş Ştatları və İran İslam Respublikası son iki gün ərzində Yaxın Şərqdəki fikir ayrılıqlarının tam və qəti şəkildə həllinə yönəlmiş çox yaxşı və məhsuldar danışıqlar aparıblar.
Həftə ərzində davam edəcək bu dərin, ətraflı və konstruktiv müzakirələrin xarakteri və tonunu nəzərə alaraq, Hərbi Nazirliyinə İran elektrik stansiyalarına və enerji infrastrukturuna qarşı bütün hərbi hücumları davam edən görüşlərin və danışıqların uğurla davam etdirilməsinə qədər beş gün təxirə salmağı tapşırdım", - o yazıb.
Qeyd edək ki, ABŞ və İran arasında nüvə proqramı ilə bağlı danışıqlarda konkret razılaşma əldə olunmadığına görə, 28 fevraldan etibarən ABŞ və İsrail İrana hərbi hava hücumlarına başlayıb. Buna cavab olaraq İran da həmin gündən etibarən İsrailə və ABŞ-nin region ölkələrindəki hərbi obyektlərinə raket və dronlarla hücum edib.
İrana hərbi hava hücumlarının ilk günündə İranın Ali Lideri Ayətullah Seyid Əli Xamenei, bir sıra yüksək vəzifəli hərbçilər ölüb. 8 martda İranın Ekspertlər Məclisi səsçoxluğu ilə Ayətullah Seyid Əli Xameneinin oğlu Seyid Muctaba Xameneini İranın 3-cü Ali Lideri seçib.
İrana hərbi hava hücumları nəticəsində İran Ordusunun Baş Qərargah rəisi general-mayor Əbdülrəhim Musəvi, İslam İnqilabı Keşikçilər Korpusunun (SEPAH) baş komandanı Məhəmməd Pakpur, Ali Liderinin müşaviri və Müdafiə Şurasının katibi Əli Şəmxani, müdafiə naziri Əziz Nəsirzadə, kəşfiyyat naziri İsmayıl Xətib, Ali Milli Təhlükəsizlik Şurasının katibi Əli Laricani, Bəsic Təşkilatının komandiri Qulamreza Süleymani və başqaları hərbi hava hücumları zamanı ölüblər.
1-5 mart tarixlərində qarşıdurma daha da genişlənərək Yaxın Şərqin müxtəlif ölkələrini əhatə edib.
Münaqişə nəticəsində regionun enerji infrastrukturu və dəniz nəqliyyatı da ciddi risk altına düşüb. Hörmüz boğazı ətrafında təhlükəsizlik gərginliyi səbəbindən dünya bazarında neft qiymətləri kəskin artıb və bir sıra ölkələr vətəndaşlarını regionu tərk etməyə çağırıb.