ABŞ-nin prioriteti təkcə dəniz yolu təhlükəsizliyi deyil, həm də İsrailin təhlükəsizliyidir- ÖZƏL
ABŞ Müdafiə Nazirliyinin sözçüsü Şon Parnell bildirib ki, husilər hücumları dayandırarsa, ABŞ da hərbi əməliyyatları bitirməyə hazırdır.
"Husilər nə vaxt dayanacağını özləri müəyyən etməlidir. Biz dəniz yollarının açıq qalmasını və bölgədə təhlükəsiz manevr imkanlarımızın olmasını təmin edənə qədər əməliyyatlar davam edəcək," - deyə Parnell vurğulayıb.
Xatırladaq ki, ABŞ Prezidenti Donald Trampın əmri ilə 15 martdan husilərə qarşı genişmiqyaslı əməliyyatlar aparılır.
Politoloq Turab Rzayev Olaylar.az-a açıqlamasında qeyd edib ki, ABŞ-nin prioriteti təkcə dəniz yolu təhlükəsizliyi deyil, həm də İsrailin təhlükəsizliyidir:
"Əslində ABŞ administrasiyasının başından planı bundan ibarətdir ki, dünyada münaqişə ocaqları son tapmalıdır. Donald Tramp həmişə deyirdi ki, ümumiyyətlə onun hakimiyyəti dövründə müharibə olmayıb, hakimiyyətdə olsaydı, Ukraynada müharibə olmazdı. Yəqin ki, o bu münaqişəni dayandıracaq. Ona görə də, İsrail ilə münaqişəni dayandırmağa çalışdı, Həmasın zəiflədilməsinə kömək elədi. Ukrayna ilə bağlı Rusiya ilə ciddi danışıqlar aparır və Qarabağ münaqişəsi ilə bağlı aktivlik var. Ən son şəxsi nümayəndəsini Bakıya göndərmişdi. Bu proseslərdə Somalidə və Yəməndə dəniz quldurları hadisəsi baş verməsi, dəniz yollarının təhlükəyə düşməsi, ticarət yollarını və donanmanın təhlükəyə düşməsi onları narahat edir. Eyni zamanda, digər tərəfdən İsrail məsələsi var. Yəni təkcə dəniz yolu təhlükəsizliyi deyil, ABŞ-nin prioteti həm də İsrailin təhlükəsizliyidir. Məhz ona görə Qəzzadan tamamilə fələstinlilərin köçürülməsi və yeni bir şəhər dövlət yaradılması planı ortaya qoyulub. Dəniz yollarını ABŞ nəzarətə götürmək istəyir ki, artıq təhlükəsizlik əsas qarant kimi çıxış eləsin. Eyni zamanda nəzərə alsaq Çin, Fransa və başqa dövlətlər də "Afrika burnu" deyilən yerdə güclənməyə çalışırlar. Həmçinin Çin Somali, Efiopiya da güclənməyə çalışır. ABŞ hətta buna görə , Somalini də dövlət kimi tanımaq və orada da möhkəmlənməyə çalışır ki, burada da Çinin möhkəmlənməsinin qarşısını alsın. Düşünürəm ki, bütün bunlara kompleks şəkildə baxılmalıdır. . Böyük ehtimal elə gəmilərin təhlükəsizliyi təmin olunarsa, ortaq məxrəcə gəlinərsə, İsrailin təhlükəsizliyi ilə ABŞ mühüm əməliyyatları dayandıra bilər. Daha çox bu iki məsələ üzərində fikir yeritdiklərini düşünürəm".
Zeynəb Mustafazadə