Bu həftə Gürcüstanda kifayət qədər həlledici olacaq- ÖZƏL

"Gürcüstanda keçirilən parlament seçkiləri kifayət qədər ciddi maraq doğururdu. Hal-hazırda Gürcüstanda Qərb və Rusiya arasında geopolitik mübarizə gedir. Bu seçkilər yalnız Gürcüstanın deyil, regionun talehi üçün beynəlxalq arenada bu seçkilərə diqqətin bu qədər olması təbii qarşılanmalıdır. 2 ildən artıqdır ki, Gürcüstan hökuməti ilə Qərb arasında da müəyyən soyuqluq var".

Bu fikirləri siyasi şərhçi Oqtay Qasımov Olaylar.az-a açıqlamasında bildirib:

"Məhz bu səbəbdən Qərb Gürcüstanda hakimiyyətini seçkilər yolu ilə dəyişməsi niyyətini açıq şəkildə ifadə edirdi. Seçkilərdən əvvəl də həm Gürcüstanda, həm də Gürcüstanı izləyən ekspertlərin əksəriyyəti bugünkü mənzərəni təxminən təsvir edə bilirdilər. Hələ o zamandan qeyd olunurdu ki, seçkilərdəm sonra Gürcüstan müxalifəti seçkiləri tanımaqdan imtina edəcək və bu prosesə Gürcüstan prezidenti xüsusi şəkildə qatılacaq. O cümlədən Qərb dövlətlərindən gələn reaksiyalar da onu göstərir ki, Qərb əslində bu ssenariyə hazır idi. Məhz əvvəlcədən planlaşdırılmış şəkildə reaksiyalar bildirməkdədir. Nəzərə alsaq ki, Aİ-yə daxil olan 13 ölkənin xarici işlər nazirlərinin verdiyi bəyanat və seçkilərin nəticələrinin tanımamaqla bağlı xüsusi mövqe nümayiş etdirilməsi vəziyyəti gərginləşdirən amillərdən sayılmalıdır. Maraqlı məqam odur ki, burada ATƏT-in müşahidəçilərinin verdiyi açıqlamada belə bu qədər sərt mövqe sərgilənməyib. Bu açıqlamada Gürcüstanda real rəqabət şəraiti yaradılıb, sadəcə olaraq orada müəyyən nüanslar, administrativ imkanlardan istifadə olunması və s. kimi məsələlər qeyd olunub. Təbii ki, seçkilərdə hansısa qüsurların olması yeni bir məsələ deyil. Bunlar mümkün variantlardır və artıq müəyyən məntəqələrdə də bununla bağlı araşdırmalar gedir. Bütünlükdə, Gürcüstanda bu həftə kifayət qədər həlledici həftə olacaq. Prezidentin çağırışı ilə etiraz mitinqi keçirildi. Prezident, o cümlədən parlamentə keçmiş 4 müxalifət bloku seçkilərin nəticələrini tanımadıqlarını bəyan etdilər. Gürcüstanda bütün hallarda məsələ siyasi yolla öz həllini tapacaq və seçkilərin nəticələri də qəbul olunacaq. Çünki Qərbdən verilən reaksiyalarda tənqidlər olsa da, gələcək əməkdaşlıq üçün sətiraltı bir əlyeri də qoyulur. Güman ki, Gürcüstan hakimiyyəti öz mövqeyini sona qədər qoruya, küçə etirazlarını sakitləşdirə bilsə, təbii ki, Qərb Gürcüstanda reallıqlarla barışaraq hazırda seçkini unutmuş siyasi qüvvəylə işləməyə davam edəcək".

Zeynəb Rzayeva