Azərbaycan XİN rəhbəri mayın 21-də Qətərə səfər edəcək
18 May 2016 15:10 SiyasətAzərbaycan xarici işlər nazirinin rəhbərliyi ilə yüksək səviyyəli nümayəndə heyətinin 21-23 may tarixlərində Dohaya səfər edəcəyi gözlənilir. Məqsəd "Sabitlik və çiçəklənmə hamı üçün" adlı 16-cı Doha Qlobal Forumunda iştirak etməkdir. Bunu APA-ya Qətərin Azərbaycandakı səfiri Səyyar bin Əbdürrəhman Cəsim əl-Muavidə bildirib. E. Məmmədyarov mayın 22-də "Beynəlxalq və regional status-kvo və çağırışlarla üzləşməyin vasitələri" adlı birinci plenar sessiyada çıxış edəcək. Artıq BMT baş katibi Pan Gi Munun da forumda iştirak edəcəyi təsdiqlənib.
Qeyd edək ki, 16-cı Qlobal Doha Forumunda beynəlxalq, regional təhlükəsizlik məsələləri, Yaxın Şərqdəki vəziyyət, qlobal iqtisadiyyat, inkişafda olan ölkələrdə vətəndaş cəmiyyətinin inkişafı və davamlı inkişaf kimi məsələlərin müzakirəsi planlaşdırılır.