Yeniyetməni qadına yer vermək istəmədiyi üçün avtobusdan çölə atdılar - ÖZƏL
Avtobus sərnişinlərindən biri 16 yaşlı yeniyetməni yaşlı qadına yer vermək istəmədiyi üçün Omsk vilayətindən 8 km aralıqda yerləşən soyuq ərazidə zorla çölə atıb. Olayların verdiyi xəbərə görə, bu barədə Tavriçeski Rayon Prokurorluğunun açıqlamasında bildirilir.
Yeniyetmənin sözlərinə görə, o, sərnişinlərə mədəsi çox ağrıdığı üçün ayaq üstə gedə bilmədiyini başa salıb, lakin kişi onu cəzalandırmaq qərarına gəlib. Sərnişin sürücünün yaşayış ərazisindən uzaqlaşana qədər gözləyib və yeniyetməni mikroavtobusun açıq qapısından zorla küçəyə atıb. Gənc dərhal anasına zəng edib, başına gələnləri danışıb və onların gəlməsini gözləyib. Hadisə ilə bağlı yaxınları hüquq-mühafizə orqanlarına şikayət etməli olub.
Prokurorluq tərəfindən sərnişindaşımaların həyata keçirilməsi zamanı yol hərəkəti təhlükəsizliyi sahəsində qanunvericiliyə riayət olunmasının yoxlanılmasına başlanılıb və iş nəzarətə götürülüb.
Daha əvvəl bildirilib ki, Sverdlovsk məhkəməsi soyuqda uşaqları avtobusdan düşürdükləri üçün daşıyıcıları cərimələyib.