Kaliforniyada miqrantlar təcridxana şəraitindən şikayətçi oldu- ÖZƏL

Kaliforniya məhkəməsi ştatdakı ən böyük müvəqqəti miqrant yerləşdirmə mərkəzində qeyri-qənaətbəxş şəraitlə bağlı şikayəti araşdırır. Olaylar.az xəbər verir ki, məhkəməyə təqdim olunan iddia ərizəsinə görə, miqrantlar mərkəzdə çirkli və soyuq yaşayış yerləri, qida və içməli su çatışmazlığı, yaxınları ilə ünsiyyət imkanlarının məhdudluğu, hüquqi yardıma gecikmiş çıxış, həmçinin təmizlik işçilərinin azlığı və ümumi köhnəlmiş infrastrukturdan narazılıqlarını bildiriblər.
Miqrantlar həmçinin dini hüquqların pozulduğunu, baş örtüklərinin, ibadət xalçalarının və dini kitabların müsadirə edildiyini bildiriblər. Onlar qeyd ediblər ki, həbs şəraiti cinayətkarlar üçün nəzərdə tutulandan da pisdir, günlərinin böyük hissəsini kamerada keçirirlər və heç bir məşğuliyyətləri yoxdur ki, bu da ümumi ümidsizlik və bədbinliyə, bəzən isə özünə zərər verməyə səbəb olur. Xroniki xəstəlikləri olan şəxslərə, məsələn, xərçəng, şəkərli diabet və ya ürək-damar xəstəliklərinə düzgün tibbi xidmət göstərilməməsi də şikayət mövzusudur. Bundan əlavə, əlilliyi olan şəxslərin ehtiyaclarının nəzərə alınmaması onların təcrid olunmasına gətirib çıxarır.
ABŞ Daxili Təhlükəsizlik Nazirliyi iddiaları rədd edərək bildirib ki, bütün həbs olunanlara üç dəfə yemək, içməli su, geyim, yataq dəsti, duş və tualet ləvazimatları, eləcə də ailə üzvləri və hüquqşünaslarla əlaqə üçün telefon təmin olunur. Qida rasionu isə sertifikatlı diyetoloqlar tərəfindən hazırlanır.
Kaliforniya-Siti şəhərindəki miqrant müvəqqəti yerləşdirmə mərkəzi əvvəllər miqrant həbsxanası kimi fəaliyyət göstərirdi. 2023-cü ildə bağlanan mərkəz, bu ilin avqust ayında 2 560 nəfər üçün nəzərdə tutulmuş müvəqqəti yerləşdirmə mərkəzi kimi fəaliyyətini bərpa edib. Hazırda mərkəzdə təxminən 800 nəfər yerləşdirilib və ABŞ Prezidenti Donald Trampın administrasiyası gələn il burada tam doluluq təmin etməyi planlaşdırır.