Türkiyə Müdafiə Nazirliyindən təyyarə qəzasının səbəbi barədə açıqlama

Türkiyə Silahlı Qüvvələrinin Gürcüstanda qəzaya uğrayan C-130 hərbi yük təyyarəsində silah-sursat olmayıb.

Olaylar.az xəbər verir ki, bu barədə Türkiyə Müdafiə Nazirliyinin sözçüsü Zəki Aktürk bildirib.

"Təyyarədə yalnız heyət üzvləri və təyyarə təmiri üçün materiallar olub, silah-sursat olmayıb", - o deyib.

Zəki Aktürk təyyarənin qəzaya uğramasının səbəbi ilə bağlı suala belə cavab verib:

"Bu mövzuda indi danışmaq hələ tezdir. Hadisənin baş vermə səbəbi, davam edən qəza araşdırması tamamlandıqdan sonra aydın olacaq".

Xatırladaq ki, noyabrın 11-də Türkiyəyə məxsus hərbi təyyarə Gürcüstanın Azərbaycanla dövlət sərhədindən təxminən 5 kilometr aralıda qəzaya uğrayıb. Təyyarə Azərbaycandan Türkiyəyə uçurdu.

Türkiyə Müdafiə Nazirliyi qəzaya uğrayan təyyarənin göyərtəsində 20 hərbçinin olduğunu açıqlayıb. Hadisənin baş vermə səbəbləri araşdırılır. (teleqraf)