Ermənistanın dövlət borcu 80% artıb, müdafiə xərcləri ixtisar edilmir – ÖZƏL

Olaylar.az xəbər verir ki, Ermənistanın dövlət borcu 2018-ci ildən bəri 80% artıb. Bu barədə maliyyə naziri Vahe Ovannisyan parlamentdə 2026-cı ilin büdcə layihəsini təqdim edərkən, müxalifətin iddialarına cavab olaraq bildirib.

Nazirin sözlərinə görə, əgər hökumət xərcləri 2018-ci il səviyyəsinə endirsəydi, borcu bir il yarım ərzində bağlaya bilərdi.
"Biz bunu etmirik, çünki keçən müddət ərzində bizim ehtiyaclarımız, eləcə də ambisiyalarımız çox dəyişib. Əgər 2018-ci ildən bəri götürülmüş borcu ödəyəcəyimizi təsəvvür etsək, o zaman xərcləri 58% azaltmalı olacağıq," - deyə Ovannisyan qeyd edib.

Maliyyə Nazirliyinin başçısı vurğulayıb ki, xərclərin ixtisarı xüsusilə müdafiə xərclərinin 65%, təhsil xərclərinin 60%, sosial xərclərin 54% və s. azalmasına səbəb olardı.

Nazir diqqəti borcun milli valyutada olan hissəsinin əhəmiyyətli dərəcədə artmasına (19%-dən 50,8%-ə) yönəldib ki, bu da borcun idarə edilməsi baxımından müsbət hesab olunur. O, ümumilikdə, struktur baxımından dövlət borcunun bu gün 2018-ci ildəkindən daha stabil olduğunu bildirib.

2025-ci ilin sonunda dövlət büdcəsinin kəsiri ÜDM-in 5,5%-i (təxminən $1,558 mlrd) səviyyəsində gözlənilir.
Hökumətin borcu 2024-cü ilin sonunda ÜDM-in 48%-ni təşkil etdiyi halda, 2025-ci ilin sonunda 50,7%-ə çatacağı proqnozlaşdırılır.
Mütləq rəqəmlərlə, 2025-ci ilin sonunda hökumətin borcunun həcmi 14 milyard 147 milyon dollar olacağı (2024-cü ilin sonunda 12 milyard 338 milyon dollar idi) gözlənilir.