Fransa Almaniyanın silahlanmasından narahatdır- ÖZƏL

Fransa siyasətçiləri Almaniya silahlı qüvvələrinin yenidən silahlanmasından narahatdır. Olaylar.az xəbər verir ki,  "Politico" xəbər verir ki, Fransanın Avropanın hərbi-sənaye lideri kimi aparıcı mövqeyini itirmək riski var. Almaniya 2029-cu ilədək müdafiə büdcəsini 153 milyard avroya çatdırmağı planlaşdırır, halbuki Fransada bu rəqəm təxminən 80 milyard avro olacaq. Almaniyanın dövlət borcunun daha aşağı səviyyədə olması hökumətə büdcə xərclərini maliyyələşdirmək üçün daha geniş imkanlar verir. Bütün silah modernləşdirmə tələblərinin ümumi dəyəri təxminən 400 milyard avro təşkil edir və onların böyük hissəsi alman istehsalçılarına yönəldiləcək.
Fransız Müdafiə Nazirliyinin anonim rəsmisi "Almaniya ilə işləmək çətin olacaq, çünki onlar üstün mövqedən çıxış edəcəklər" - deyə bildirib. O, zarafatla əlavə edib ki, Almaniyanın 1940-cı ildəki kimi Alsas və Mozelə ərazi iddialarına ehtiyacı yoxdur, çünki "sadəcə onları ala bilərlər".
Beynəlxalq layihə olan altıncı nəsil döyüş təyyarəsi FCAS (Future Combat Air System) isə Fransa, Almaniya və İspaniya tərəfindən birgə hazırlanmalıdır, lakin fransız və alman tərəfləri arasında fikir ayrılıqları layihəni çətin vəziyyətə salıb. Almaniyada layihənin yalnız İspaniya ilə davam etdirilə biləcəyi və ya yeni bir layihənin İsveç və Böyük Britaniya ilə başlaya biləcəyi ehtimal olunur ki, bu da Parisdə narahatlıq doğurur.
Aİ rəsmisi Almaniyanın silahlanmasını "tektonik proses" adlandırıb. Qəzet yazır ki, Almaniya Avropanın iqtisadi mühərrikindən müdafiə-sənaye qüvvəsinə çevrilir, Fransa isə nüvə dövlət statusunu qorumağa çalışır, Polşa isə konvensional qüvvələr baxımından "ağırlıq mərkəzi" rolunu gücləndirir. Brussels üçün əsas sual isə budur, bu dəyişiklik Avropa İttifaqını hərbi inteqrasiyaya yönəldəcək, yoxsa müdafiə sahəsində parçalanmanı dərinləşdirəcək?