Ukrayna istehsal olunan silahların ixracına icazə verən mexanizm hazırlayıb- ÖZƏL

Ukrayna hökuməti ölkədə istehsal edilən, lakin ordunun ehtiyacları üçün alınması mümkün olmayan silahların ixracına icazə verən yeni mexanizm hazırlayıb. Olaylar.az xəbər verir ki, bu barədə Ukraynanın Milli Təhlükəsizlik və Müdafiə Şurasının (MTMŞ) katibi Rustem Umerov məlumat verib. Onun sözlərinə görə, ilk ixrac müqavilələrinin gələn ilin ikinci yarısından əvvəl gözlənilməsi inandırıcı deyil. Umerov bildirib ki, Ukrayna müdafiə sənayesi illik 60 milyard dollarlıq məhsul istehsal etmək potensialına malikdir. Lakin dövlət bu qədər böyük həcmdə sifariş verə bilmədiyi üçün yeni nəzarətli ixrac sistemi tətbiq edilir. Mexanizm həm müəssisələrin fəaliyyətini artırmağı, həm də dövlət büdcəsinə əlavə gəlir gətirməyi hədəfləyir. İlk növbədə xaricə Ukraynada istehsal olunan pilotsuz uçuş aparatları göndəriləcək. İxrac üçün şirkətlər Dövlət İxrac Nəzarəti Xidmətinə müraciət etməli olacaqlar. MTMŞ yanında xüsusi komissiya məhsulun "artıq" olub-olmadığını müəyyən edəcək. Ordunun həmin silaha ehtiyacı yarandığı təqdirdə, verilmiş icazə dayandırıla və ya ləğv edilə bilər. Şura, həmçinin Ukraynanın silah satışına icazə veriləcək "dost ölkələr" siyahısını təsdiqləyəcək. İlk nümayəndəlik ofisləri Berlin və Kopenhagen şəhərlərində açılacaq.
Məsələ uzun müddətdir Kiyevdə müzakirə edilirdi. Ekspertlər qeyd edirlər ki, hazırda Ukraynada inkişaf edən yeganə sahə müdafiə sənayesidir. Lakin Müdafiə Nazirliyi istehsal olunan bütün məhsulu ala bilmir. Bu səbəbdən Kiyev dəfələrlə Qərb tərəfdaşlarından Ukrayna müəssisələrində sifariş yerləşdirməyi xahiş edib.
Analitiklərin sözlərinə görə, Qərb ölkələri Ukraynaya yardım paketləri ayırsa da, bu vəsaitlərin əhəmiyyətli hissəsi həmin donor ölkələrin öz hərbi proqramlarına və ya ABŞ və Avropa istehsalçılarından silah alınmasına sərf olunur.
Kiyev hesab edir ki, silah ixracının rəsmiləşdirilməsi büdcə kəsirinin azaldılmasına da töhfə verəcək. Ukrayna hakimiyyəti etiraf edir ki, ölkə yalnız hərbi xərclərin bir hissəsini öz gücü ilə qarşılaya bilir, digər sahələr isə tam olaraq Qərbin maliyyə dəstəyi hesabına maliyyələşir. Beynəlxalq Valyuta Fondu və digər tərəfdaşlar isə Kiyevdən yeni maliyyə mənbələri tapmağı tələb edirlər.