Gürcü deputatdan sərt ittiham: "Gürcü Arzusu" Avropa inteqrasiyasını qəsdən dayandırıb – ÖZƏL

Olaylar.az xəbər verir ki, Gürcüstan parlamentinin "Qaxariya uğrunda Gürcüstan" partiyasından olan deputatı Georgi Şaraşidze "Rustavi 2" telekanalının "Aİ-nin Gürcüstanın üzvlüyünü dayandırmaq qərarının İrakli Kobaxidzenin bəyanatından beş ay əvvəl qəbul edilməsi" barədəki məlumatını şərh edib.

Şaraşidze Aİ-nin Gürcüstanın tərəqqisini neqativ qiymətləndirməsində təəccüblü bir şey olmadığını bildirib, lakin Aİ səfirinin məktubunun əsl mahiyyəti ilə bağlı şübhələrini ifadə edib.

Deputat iddia edib ki, Avropa İttifaqına inteqrasiya prosesi "Gürcü Arzusu" tərəfindən qəsdən dayandırılıb.
Şaraşidzeyə görə, buna səbəb hakim partiyanın yalnız ölkədə demokratiya istəməməsi deyil, həm də Avropanı istəməməsidir, çünki "Avropa demokratiyası şəraitində hakimiyyətini qoruyub saxlaya bilməyəcək".

O, "Gürcü Arzusu"nu "Gürcü xalqının və dövlətinin milli maraqlarına xəyanət edən rejim" adlandırıb.
Deputat Aİ səfirinin XİN-ə göndərdiyi məktubu faktın sübutu kimi deyil, Gürcüstandakı ümumi reqressin (geriləmənin) etirafı kimi qəbul etdiyini bildirib. O, "təəccüblənir" ki, Aİ kimi bir qurum bu qədər vacib mövqeyini bir adi məktubla ifadə etməklə məhdudlaşır.

Şaraşidze ölkədə demokratik geriləmənin bir il əvvəl deyil, hələ 5 il əvvəl, partiyalarının lideri Georgi Qaxariya baş nazir postundan istefa verdikdən sonra başladığını vurğulayıb.