İndoneziyanın paytaxtı hara köçürülür?

İndoneziyanın paytaxtı hara köçürülür?

Bu məqsədlə 32 milyard dollara yaxın vəsait xərclənəcək

İndoneziyanın paytaxtı Cakartadan Kalimantan adasının cənub-şərq hissəsinə köçürüləcək.

TASS informasiya agentliyi xəbər verir ki, İndoneziya Prezidenti Coko Vidodo paytaxtın köçürülməsi barədə qərarı mili televiziyanın canlı yayımında elan edib.

Bu məqsədlə 32 milyard dollara yaxın vəsait xərclənəcək, əsas işlərin 2021-ci ildə başlayacağı gözlənilir. Ölkənin Planlaşdırma və Milli İnkişaf naziri Bambanq Broconeqronun sözlərinə görə, hakimiyyət orqanları 2024-cü ilədək hökumət strukturlarını yeni paytaxta köçürməyi planlaşdırırlar.

Kalimantan adası seysmoloji cəhətdən təhlükəsiz rayonda yerləşir. 18 min adadan ibarət İndoneziya arxipelaqının Sakit okeanın odlu halqasında yerləşdiyi nəzərə alınarsa, bu faktor xüsusilə aktualdır. Belə ki, arxipelaqda gün ərzində orta hesabla 5-6 tektonik kataklizm baş verir.

Digər tərəfdən, İndoneziyanın hazırkı paytaxtında şəhər infrastrukturu zəif inkişaf edib. "Uber" kompaniyasının məlumatına görə, avtomobil sürücüləri Cakartada il ərzində 22 günü tıxaclarda keçirirlər. Həmçinin "Inrix" kompaniyasının məruzəsinə əsasən, bu şəhər dünyanın ən yüklənmiş meqapolisləri siyahısında 12-ci yeri tutur.(AZƏRTAC)