Yaponiyalı tədqiqatçılar Qazaxda

Azərbaycan-Yaponiya ekspedisiyası Damcılı mağarasında arxeoloji tədqiqatları davam etdirir

Azərbaycan-Yaponiya ekspedisiyası Damcılı mağarasında arxeoloji tədqiqatları davam etdirir

Azərbaycan-Yaponiya beynəlxalq arxeoloji ekspedisiyası "Avey" Dövlət Tarix-Mədəniyyət Qoruğu ərazisində Qazax rayonunun Daşsalahlı kəndi yaxınlığında yerləşən Damcılı mağara düşərgəsində tədqiqatları davam etdirir.

Tədqiqatlara AMEA Arxeologiya və Etnoqrafiya İnstitutunun əməkdaşları - tarix üzrə fəlsəfə doktorları Azad Zeynalov  və Mənsur Mənsurov, həmçinin institutun elmi işçiləri Yaqub Məmmədov və Ülviyyə Heydərova cəlb ediliblər.

Yaponiya tərəfini Tokio Universitetinin professoru Yoşihiro Nişiakinın başçılığı ilə Qədim Şərq Muzeyinin, Yapon Elmin İnkişafı Cəmiyyətinin, Vaseda Universitetinin, Kanazava Universitetinin və digər elmi mərkəzlərin arxeologiya, paleobotanika, paleobiologiya, topoqrafika və başqa sahələr üzrə mütəxəssisləri təmsil edirlər. Aparılan tədqiqatlar nəticəsində ərazidə orta əsrlər, tunc, xalkolit, neolit, mezolit və orta paleolit təbəqələri aşkar olunub.

Azərbaycan ərazisində Qobustandan sonra ilk dəfə Damcılı düşərgəsində toxunulmamış mezolit təbəqəsi qeydə alınıb. Bu tədqiqatın əsas məqsədi regionda neolit dövrü mədəniyyətinin mənşəyi məsələsinin aydınlaşdırılmasıdır. Damcılı düşərgəsində toxunulmamış mezolit mədəni təbəqəsinin aşkarlanması Azərbaycan ərazisində neolit mədəniyyətinin (əsasən Şomutəpə mədəniyyətinin) kənar mədəni təsirlərin və regiona Ön Asiyadan miqrasiyanın dinamikasında məhz yerli mezolit mədəniyyəti əsasında inkişaf etməsi barədə fikir yürütməyə əsas verir. Gələcəkdə aparılacaq tədqiqatlar və aşkar olunacaq yeni sahələr nəticələri gücləndirməyə imkan verəcək.