Ermənistanda azərbaycanlılara mülk satışını qadağan edən qanun layihəsi hazırlanıb – ÖZƏL

Olaylar.az xəbər verir ki, "Güclü Ermənistan" partiyasından baş nazirliyə namizəd, iş adamı Samvel Karapetyan seçkilərdə qalib gələcəkləri təqdirdə hökumətin ilk iclasında Azərbaycan vətəndaşlarının Ermənistanda torpaq və daşınmaz əmlak almasını, eləcə də onlara mülklərin hədiyyə edilməsini qadağan edən qanun qəbul edəcəklərini bəyan edib. 

Müxalifət Nikol Paşinyan və İlham Əliyevin 300 min azərbaycanlının Ermənistana köçürülməsi ilə bağlı "gizli proqramı" olduğunu iddia edərək, hazırladıqları layihəni şərti olaraq "Safarovun qarşısının alınması" qanunu adlandırıb. Hüquqşünas Aram Vardevanyan beynəlxalq praktikada belə məhdudiyyətlərin olduğunu və layihənin milli təhlükəsizliyi təmin etmək məqsədi daşıdığını bildirib. 

Digər tərəfdən, partiya nümayəndəsi Qohar Meloyan sülh bəyanatlarına baxmayaraq, Azərbaycan hərbçilərinin Ermənistanın dörd vilayətində mövcudluğunu davam etdirdiyini və anklavlar məsələsinin hələ də açıq qaldığını iddia edib. Samvel Karapetyan hakimiyyətə gələcəkləri təqdirdə bu qanunun bir həftə ərzində qüvvəyə minəcəyini vurğulayıb.