Çoxtərəfli sistem müasir reallıqlara uyğunlaşmalıdır – Rebekka Qrinspen
Dünya dönüş nöqtəsindədir və çoxtərəfli sistem müasir reallıqlara uyğunlaşmalıdır.
Bu barədə Birləşmiş Millətlər Təşkilatının Ticarət və İnkişaf üzrə Konfransının (UNCTAD) baş katibi Rebekka Qrinspen XIV Qlobal Bakı Forumunun Bəyannaməsinin və GPA jurnalının 12-ci sayının təqdimatında bildirib.
Onun sözlərinə görə, dünyada münaqişələrin sayı artır, etimad və çoxtərəfli sistemə etimadı bərpa etmək üçün isə vaxt azalır.
"Lakin bunu etmək üçün BMT Nizamnaməsinin prinsiplərini müdafiə etməliyik. Həmçinin 1945-ci ildə yaradılmış BMT-nin 2026-cı ildə hədəflərini dəyişdirməsini və onlara çatmasını təmin etməliyik", - deyə Qrinspen bildirib.
O qeyd edib ki, BMT 1945-ci ildə təsis ediləndə onun Nizamnaməsini 51 ölkə imzalayıb, halbuki bu gün təşkilatın 193 üzv ölkəsi var. "Bu o deməkdir ki, 1945-ci ildə 142 ölkə BMT-də yox idi. Onların bir çoxu o dövrdə müstəqil dövlətlər belə deyildi. Buna görə də, 1945-ci ildə təmsil olunmayan ölkələrin daha çox təmsilçiliyinə və səsinə ehtiyac var", - deyə o bildirib.
Qrinspen həmçinin dəyişikliklərə ehtiyac olduğunu vurğulayıb, çünki bugünkü dünyada bir çox imkanlar və resurslar artıq əvvəllər olduğu kimi yalnız BMT daxilində cəmləşmir.
O, dialoq və həll yollarının hazırlanmasını asanlaşdıran regional təşkilatların və yeni aktyorların, o cümlədən Nizami Gəncəvi Beynəlxalq Mərkəzi kimi strukturların əhəmiyyətini qeyd edib.
"BMT hər şeyi özündə cəmləşdirməyi deyil, sülh üçün həll yolları təklif edənləri dəstəkləməyi öyrənməlidir", - deyə o bildirib.
Onun sözlərinə görə, BMT müxtəlif aktyorlarla və yerli, milli və regional kimi müxtəlif səviyyələrdə tərəfdaşlıq inkişaf etdirməlidir.
Qrinspen vurğulayıb ki, çoxqütblü dünyada çoxqütblülük olmadan parçalanma, münaqişə və rifahın azalması riski artacaq. "Çoxqütblülük olmadan çoxqütblülük parçalanmaya səbəb olacaq", - deyə o qeyd edib.
O, həmçinin bildirib ki, müasir dünya həm mənfi, həm də müsbət tendensiyalarla qarşılaşdığı bir yol ayrıcındadır və çox şey beynəlxalq ictimaiyyətin seçimlərindən və qərarlarından asılıdır.