“Azərbaycan və Türkiyə ortaq təhlükəsizlik sistemi qurur” – Elçin Xalidbəyli – ÖZƏL

Türkiyənin milli müdafiə naziri Yaşar Gülərin Azərbaycana səfərini  regional təhlükəsizlik və hərbi əməkdaşlıq baxımından necə qiymətləndirmək olar?

"Azərbaycan və Türkiyə  strateji müttəfiq və qardaş ölkələrdir. Vaxtaşırı hər iki ölkənin ən yüksək səviyyəli rəsmi nümayəndələri qarşılıqlı səfərlər edirlər. Xüsusilə də hərbi və təhlükəsizlik sahəsinə cavabdeh olan yüksək rütbəli şəxslərin səfərləri xüsusi əhəmiyyət daşıyır. Türkiyənin müdafiə nazirinin  Azərbaycana səfəri də bu baxımdan mühüm əhəmiyyət kəsb edir".

Bu sözləri Olaylar.az-a açıqlamasında siyasi şərhçi Elçin Xalidbəyli deyib. Siyasi şərhçinin sözlərinə görə,  Azərbaycan və Türkiyə strateji və hərbi müttəfiqlik əsasında  Cənubi Qafqazda və Yaxın Şərqdə ortaq fəaliyyət göstərərək regional təhlükəsizlik və əməkdaşlıq istiqamətində qətiyyətli addımlar atırlar:

"İki ölkə arasında strateji müttəfiqlik eyni zamanda hərbi müttəfiqlik xarakteri daşıyan bir münasibətdir. Hazırda  Azərbaycan və Türkiyə arasında bəzi regionlarda ortaq fəaliyyət istiqamətləri mövcuddur. Xüsusilə də  Cənubi Qafqazda Azərbaycan-Türkiyə ittifaqı əsas geosiyasi iradə sahibi kimi çıxış edir. Bu regionda  Azərbaycan-Türkiyə ittifaqının müsbət qarşılamadığı heç bir xarici gücün maraqlarını reallaşdırması mümkün deyil. Bu baxımdan demək olar ki, Cənubi Qafqaz artıq tam şəkildə  Azərbaycan-Türkiyə ittifaqının təsir və nəzarəti altındadır. Eyni zamanda bu iki ölkə Yaxın Şərqdə də sıx əməkdaşlıq edir və yüksək səviyyədə birgə fəaliyyət göstərirlər. Xüsusilə də Suriyanın yenidən bərpası prosesində Azərbaycan və Türkiyə arasında sıx tərəfdaşlıq mövcuddur. Bu əməkdaşlıq müxtəlif sahələri əhatə etməklə Suriyanın gələcək taleyində mühüm rol oynaya bilər. Həmçinin  Azərbaycan və Türkiyənin ortaq təhlükəsizlik maraqları da var. Bura hər iki ölkənin hərbi müdafiə sistemlərinin təkmilləşdirilməsi, orduların ən müasir silahlarla təchiz olunması və hərbi sənaye komplekslərinin ortaq istehsal imkanlarının gerçəkləşdirilməsi kimi mühüm məsələlər daxildir. Hazırda bu iki qardaş dövlət strateji müttəfiqlik əlaqələrini daha da inkişaf etdirmək və ortaq təhlükəsizlik sisteminin qurulması istiqamətində qətiyyətli addımlar atmaqda davam edir".

Səidə Ramazanova