Bakı "güzgü prinsipini" qəbul etməyəcək- ÖZƏL

Azərbaycan və Ermənistan dövlət sərhədinin delimitasiyası komissiyalarının növbəti görüşü yanvarın sonunda keçiriləcək. Siyasi şərhçi Asif Nərimanlı Olaylar -a bildirib ki, bu görüşlərə ehtiyac var, xüsusilə prosesin ikitərəfli formatda davam etdirilməsi baxımından:
"Lakin tərəflərin açıqlamaları sülh danışıqlarına dair fikir ayrılığının aradan qalxmadığını deməyə əsas verir. Bakı sərhədin delimitasiyasını sonraya saxlamağı, sülh sazişinin imzalanmasını, yaxud ən azı bununla bağlı niyyət sənədinin qəbul edilməsini istəyir.
İrəvan "güzgü prinsipi"ni - qoşunların qarşılıqlı şəkildə geri çəkilməsini irəli sürür və ikitərəfli formatda danışıqları daha çox sərhəd məsələsi üzərində fokuslamaqla əsas müzakirələri Qərb platformasına daşımağa çalışır. Bu yanaşma sülh sazişinin imzalanmasını gecikdirən amildir. Çünki Bakı "güzgü prinsipi"ni qəbul etməyəcək, bunu İrəvanda da anlayırlar. Bu baxımdan, sərhəd komissiyaların görüşünün müsbət tərəfləri olsa da, əsas diqqətin buna fokuslanmağı prosesin uzanmasına zəmin yaradır".