Paşinyan Rusiyadan üzülüşmək istəyir

"Ermənistanın baş naziri Nikol Paşinyan dünən keçirdiyi mətbuat konfransında xeyli ziddiyyətli açıqlama verdi. O, Rusiyanın ünvanına  daha sərt  fikir səsləndirməkdən çəkinmədi.  Paşinyan Rusiyanın Ermənistanda hərbi bazasına ehtiyac yoxdur fikrini  ortalığa atmaqla Qərbin yanında olduğuna işarə etdi. Zavallı  Paşinyanın  bu açqlamaları Rusiyanın qəzəbinə düçar olacağına şübhə doğurmur". Bunu "Olaylar"a deyən Sosial Rifah və Tədqiqatlar İctimai Birliyinin sədri Əkrəm Baydəmirli qeyd edib ki, artıq Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Konstantin Zatulin Ermənistanın baş naziri Nikol Paşinyanın ünvanına ittihamlar səsləndirib: "Zatulin  qeyd edib ki, Paşinyan hakimiyyəti manevr edir. Son altı ayda Ermənistan açıq şəkildə müttəfiqlərini dəyişməyə çalışır. Rusiyanı Qərblə əvəzləyir. Göründüyü kimi, Paşinyan Rusiyadan üzülüşmək istəyir. Əsas məsələ odur ki, üzülüşə biləcəkmi?  Axı Ermənistanı dövlət edən, erməniləri bu regiona köçürən, 30 ildir Qarabağ münaqişəsini yaradıb, idarə edən Rusiya olub. Ona görə, Rusiya onun ipini çətinki buraxsın. Ermənistanın baş naziri Nikol Paşinyanın dünən keçirdiyi mətbuat konfransında digər bir məqam diqqəti çəkdi.  Jurnalistin Azərbaycanla sülh müqaviləsinin imzalanması məsələsi ilə bağlı sualına cavab verən Nikol deyəsən dərk etməyə çalışır ki, Azərbaycanla və Türkiyə ilə normal əməkdaşlıq olmadan Ermənistanın böhrandan çıxması mümkünsüzdür".