BƏƏ Ukrayna vətəndaşları üçün vizasız rejimi dayandırıb

Olaylar.az xarici KİV-ə istinadən xəbər verir ki,  Birləşmiş Ərəb Əmirlikləri Ukrayna Nazirlər Kabineti ilə BƏƏ hökuməti arasında viza tələblərinin qarşılıqlı ləğvinə dair anlaşma Memorandumunun fəaliyyətini dayandırıb. 

Bu barədə martın 2-də  Ukraynanın Abu Dabidəki səfirliyi öz Facebook səhifəsində məlumat yayıb .

"2022-ci il martın 1-dən Birləşmiş Ərəb Əmirlikləri Ukrayna Nazirlər Kabineti ilə Birləşmiş Ərəb Əmirlikləri hökuməti arasında viza tələblərinin qarşılıqlı ləğvinə dair Anlaşma Memorandumunun fəaliyyətini müvəqqəti dayandırır. Bu gün Ukrayna vətəndaşları BƏƏ-yə səfər etmək üçün müvafiq viza almalıdır" - deyə agentliyin bəyanatında deyilir.

Qeyd olunur ki, memorandumun dayandırılması artıq BƏƏ ərazisində olan Ukrayna vətəndaşlarına təsir etməyəcək.

Ukrayna və Birləşmiş Ərəb Əmirlikləri 2017-ci ildə vizasız rejim haqqında razılığa gəliblər. Müvafiq memorandumu Ukraynanın keçmiş prezidenti Petro Poroşenko və Dubay əmiri Şeyx Məhəmməd bin Rəşid Əl Maktum imzalayıblar.