Paşinyan diktatura rejimini sərtləşdirir
Anar Məmmədov: "Artıq bu bir faktdır ki, Paşinyanın hakimiyyətdə qalmaq istəyi mümkün olmayacaq"
Onsuz da iqtisadi və sosial baxımdan dərin böhran keçirən Ermənistan dövləti sentyabrın 27-də Azərbaycana qarşı başlamış olduğu yeni müharibə ilə tarixin yalnışına yol verdi deyə bilərik. Hakimiyyəti zəbt etdiyi gündən sadə erməni xalqı üçün müsbət istiqamətdə heç bir addım ata bilməyən, hakimiyyətə gəldiyi zaman verdiyi heç bir vədi reallaşdırmayan Nikol Paşinyan tədricən artan xalq narazılığı fonunda düşünürdü ki, Azərbaycana qarşı müharibəyə start verib yeni ərazilər işğal etməklə xalq arasında itən reytinqini yenidən bərpa edə və siyasi rəqiblərini zərərsizləşdirə bilər. Ancaq düşmən ölkənin baş naziri Azərbaycan Ordusunun gücünü, potensialını düzgün hesablaya bilməmişdi və nəticə etibarilə Ermənistanın sentyabrın 27-də başlamış olduğu 44 günıük müharibə bu ölkənin biabırçı şəkildə məğlubiyyəti ilə nəticələndi.
Hakimiyyətə gəldiyi gündən ölkədə diktatura rejimi yaradan Paşinyan müharibədən sonrakı dövrdə siyasi təqibləri, insanları siyasi baxışlarına görə həbs etdirməyi daha da sürətləndirib. Bu gün sadə erməni xalqı haqlı olaraq Paşinyandan nəticəsiz və acı məğlubiyyətlə bitən müharibəyə getməsinin səbəbini soruşduğu halda, erməni baş naziri ciddi cəhdlə xalq kütlələrinin səsini boğmağa çalışır.
Düşmən ölkədə cərəyan edən daxili siyasi proseslərə diqqət çəkən Milli Məclisin deputatı Anar Məmmədov deyir ki, Ermənistanın daxilindəki hazırkı biabırçı mənzərə və gərgin vəziyyət, Paşinyana qarşı artan etirazlar, eyni zamanda Qarabağ erməniləri ilə Ermənistan erməniləri arasındakı qarşıdurma bir növ 1992-1993-cü illərdəki Azərbaycanı xatırladır: "Bunun səbəbi odur ki, müharibədəki məğlubiyyətdən sonra Paşinyan hakimiyyətinin istefasını tələb edən xalqa qarşı iqtidar repressiya siyasətini davam etdirdiyi təqdirdə etirazçılar da məqsədlərinə çatmayana qədər mitinqlərə son qoymayacaqlar. Azərbaycan qarşısında acı məğlubiyyətə uğrayan ölkənin baş naziri bu gün iqtidardan getməmək üçün diktatura rejimini hər gün daha da sərtləşdirir, demokratik azadlıqların tapdanmasını adi hala çevirir, fərqli düşünənləri ciddi şəkildə cəzalandırır, siyasi partiya rəhbərlərinin, siyasi fəalların saxlanılmasına göstəriş verir, deputatlara qarşı hücumlar təşkil edir. Hətta Qarabağda döyüşən, ancaq varlığından xəbər olmayan əsgərlərin valideynləri etiraz səslərini ucaltdıqlarına görə polis zoraklığına məruz qalırlar. Bütün bunlarla bərabər, İrəvana gələn Qarabağ ermənilərinin məskunlaşma ilə bağlı yerli ermənilərlə ədavəti bir daha sübut edir ki, Ermənistan hakimiyyəti məntiqli, rasional düşüncəyə malik deyil, onlar erməni xalqının yox, sırf xarici qüvvələrin maraqlarına xidmət edirlər. Ermənistana gələnlərin çox az hissəsi vətəndaşlıq almaq arzusunda olur, on minlərlə in¬san isə Ermənistan vətəndaşlığından imtina edir. Bunun başlıca səbəbi işğalçı ölkənin baş nazirinin indiyə kimi xalqını aldadıb, həqiqəti gizlətməsidir. Xalq ilk olaraq isə bunu tələb edir".
Deputat deyib ki, ağır sosial-iqtisadi problemlər məngənəsində boğulan Ermənistanın üzləşdiyi böhranın qarşıdakı müddət ərzində daha da dərinləşəcəyi istisna deyil: "Belə vəziyyətdə Ermənistanda sayı sürətlə azalmaqda olan əhalinin hakimiyyətə qarşı sosial narazılığının daha da güclənəcəyi, eyni zamanda, miqrasiya prosesinin yeni vüsət alacağı ehtimalını sürətləndirir. Artıq bu bir faktdır ki, Paşinyanın hakimiyyətdə qalmaq istəyi mümkün olmayacaq. Əvvəlki dövrlərdə ölkədəki hakimiyyət komandaları iqtidarda qalmaq üçün daxili auditoriyaya Ermənistanı qalib ölkə kimi təqdim edirdilər. Necə deyərlər, xəstə təfəkkürü və işğal siyasətini bütün erməni cəmiyyətinə sırımışdılar. Amma bu siyasətin Ermənistanı iflic vəziyyətinə salması son illərdə özünü daha qabarıq büruzə verdi. Paşinyan da hakimiyyətə gəldikdən sonra əvvəlki iqtidarların siyasətini davam etdirdi. İndi bu amil aradan qalxıb. Amma istənilən halda ölkədə baş verənlər yeni toqquşmalar və vətəndaş qarşıdurması üçün münbit şərait yaradıb. Ermənistanda daha xaotik hadisələrin baş verəcəyi isə qaçılmazdır. Lakin əfsuslar olsun ki, Avropa dövlətləri, beynəlxalq təşkilatlar müxalifətin bu qeyri-demokratik kampaniyasına səssiz qalır, demokratiya və insan haqlarının qorunmasından bəhs etmir. Bütövlükdə isə bütün bunlar Ermənistanın böyük tənəzzül yaşadığını göstərir. İşğal siyasətinin qurbanı olan bu ölkə üzləşdiyi problemlərdən hələ uzun müddət xilas ola bilməyəcək".
Süleyman