İdman mütəxəssisləri mükafatlandırılacaq

Oktyabrın 4-də Azərbaycan Milli Olimpiya Komitəsinin Ədalətli Oyunlar Komissiyasının təşkilatçılığı ilə ölkəmizdə Ədalətli Oyunlar Hərəkatının təbliği ilə bağlı tədbir keçiriləcək. "OLAYLAR"-a daxil olan məlumata görə,  tədbirdə Olimpiya çempionları Lyudmila Şubina, Zemfira Meftəhətdinova, Namiq Abdullayev, Fərid Mansurov, Elnur Məmmədli, olimpiya mükafatçıları Vitali Rəhimov, Rövşən Bayramov, vaxtilə ROİL-də təhsil almış veteran idmançı, məşqçi və mütəxəssislər, tanınmış idmançılar, eləcə də idman ictimaiyyətinin digər nümayəndələri işitirak edəcəklər. Tədbirdə idman mütəxəssisləri, idmançılar, məşqçilər, fəxri qonaqlara və s. AzƏOK-un müxtəlif nominasiyaları üzrə mükafatları təqdim olunacaq.

Qeyd edək ki, Ədalətli Oyunlar Hərəkatı ötən əsrin 60-cı illərində yaranıb. 1963-cü il dekabrın 5-də Parisdə ədalətli oyunlar üzrə Pyer de Kuberten Fondu təsis edilib, 1973-cü il mayın 29-da isə bu fond Beynəlxalq Ədalətli Oyunlar Komitəsi (CİFP) adı alıb. Belə bir qitə təşkilatının yaradılması ideyası da ötən əsrin ikinci yarısından müxtəlif toplantılarda səslənib.