“Malta ilə oyunun nəticəsi bizi aldatmamalıdı” - MÜSAHİBƏ
Dünya çempionatının seçmə qrup mərhələsi çərçivəsində sentyabrın 7-də Ramat-Qan şəhərində İsrail millisi ilə qarşılaşacaq Azərbaycan yığmasının hücumçusu Rauf Əliyevin apasport.az saytına müsahibəsi
- Milli komanda Bakıda keçirdiyi toplanışı başa vuraraq artıq İsrailə yollanır. Qarşılaşmaya nə dərəcədə hazırsınız?
- Rəsmi oyundu, məsuliyyətini anlayırıq. Yaxşı hazırlıq keçmişik. Komandada 1-2 zədəli futbolçu var. Amma komanda şəklində yaxşıyıq.
- Səfər matçında nəyə ümid etmək olar?
- Hər şey ola bilər. Rəqiblə başabaş oynamaq olar. İsrail supergücə malik komanda deyil. Onların da heyətlərində itkilər var. Səfərdə oynadığımızı nəzərə alaraq, heç-heçə də etmək olar, hətta qələbə də qazana bilərik. Əsas odu ki, inam olsun.
- Yığma cari mövsümdə udulası oyunların heç birində qələbə qazana bilmədi. Bu nədən irəli gəlir?
- Düzdü, xüsusilə Lüksemburqla oyunlarda qələbə qazanmalı idik. Bunu reallaşdıra bilsəydik, indi ab-hava tamam fərqli olacaqdı. Malta ilə oyunun nəticəsi də bizi aldatmamalıdı. Ciddi yanaşmalıyıq ki, qalib də gələ bilək.
- Turnir cədvəlindəki vəziyyət İsrail yığmasını daha da həvəsləndirə bilərmi?
- Əlbəttə, İsrail bu gün Rusiya və Portuqaliya kimi komandalarla qrupdan çıxmaq uğrunda mübarizə aparır. Tam fərqli istəklə çıxacaqlar. Nüfuz baxımından ən azı qələbə qazanmalıyıq.
- Formasını geyindiyiniz "Bakı" klubunun son görüşündə qol vurdunuz. Bu amil yığmadakı matça köklənmək baxımından müsbət rol oynaya bilərmi?
- Klub və millidəki ab-hava tam fərqlidi. Milliyə nə vaxt dəvət edilmişəmsə, çalışmışam ki, canla-başla verilən tapşırıqları yerinə yetirim, komandaya faydalı olum. İnanıram ki, həm özüm, həm də komandamız üçün yaxşı oyun olacaq.
- "Bakı" çempionata məğlubiyyətlərlə başlasa da, son üç oyunda qələbələri sıralayır. Qısa vaxt ərzində Milinko Pantiç nəyi dəyişdi?
- Nəticənin bu cür olacağı gözlənilən idi. Heyətdə dəyişiklik edildi. Yeni baş məşqçi, futbolçular gəldi. Yeni yığılmış komandayıq. Hər şeyə sıfırdan başlanıldı. Həm də mövsümün əvvəlində əksər klublarda bu hiss olunur.
- İşlərin qaydasına düşdüyünü söyləmək olarmı?
- Hər şey yaxşıdır. Ardıcı qələbələr qazanmışıq. İndi bunun davamını gətirməliyik.
- Klubunuzda qolları daha çox yerli futbolçular vurur...
- Baş məşqçi yerli futbolçulara daha çox güvənir. Həm də hücum xəttində öz oyunçularımız daha çoxdur. Bu da özümüzü göstərmək, yerli futbolçulara inam qazandırmaq baxımından əla fürsətdir.