Reuters: “İran ABŞ ilə razılaşma üçün güzəştə hazırdır” ÖZƏL

İran ABŞ ilə nüvə proqramı üzrə danışıqlarda müəyyən güzəştlərə getməyə hazır olduğunu bildirib. Olaylar.az xəbər verir ki, Reuters-in məlumatına görə, Tehran sanksiyaların ləğvi və uranın dinc məqsədlərlə zənginləşdirilməsi hüququnun tanınması qarşılığında kompromis təklif edir.

Məlumata əsasən, tərəflər arasında keçirilən iki raund danışıqlara baxmayaraq, sanksiyaların miqyası və mərhələli şəkildə ləğvi mexanizmi ilə bağlı fikir ayrılıqları qalmaqdadır. Bununla belə, İranın ötən həftəki gərgin danışıqlardan sonra yeni güzəştlər təklif etməsi diplomatik həll variantının qorunmasına yönəlmiş addım kimi qiymətləndirilir.

İran rəsmisinin sözlərinə görə, Tehran yüksək səviyyədə zənginləşdirilmiş uranın yarısını xaricə göndərməyi, qalan hissəsini isə seyrəltməyi nəzərdən keçirə bilər. Həmçinin ölkə uranın zənginləşdirilməsi üzrə regional konsorsiumun yaradılmasında iştirak etməyə hazırdır.

Bunun müqabilində İran ABŞ-dən özünün "dinc məqsədli uran zənginləşdirmə" hüququnun tanınmasını və iqtisadi sanksiyaların aradan qaldırılmasını tələb edir. Tehran eyni zamanda ABŞ şirkətlərinə İranın iri neft-qaz sektorunda podratçı kimi iştirak imkanları da təklif edib.

Rəsmi mənbə bildirib ki, tərəflər arasında fikir ayrılıqları davam etsə də, aralıq sazişin əldə olunması ehtimalı qalır. İranın xarici işlər naziri Abbas Əraqçi yaxın günlərdə ABŞ-nin xüsusi nümayəndəsi ilə Cenevrədə görüş gözlədiyini və diplomatik həll üçün "yaxşı şansın" hələ də mövcud olduğunu vurğulayıb.