Mutasiyalı qrip Türkiyəyə də çatdı, Azərbaycanda… - “10 ilin ƏN GÜCLÜSÜDÜR

Dünya üzrə həyəcan siqnalı verən mutasiyaya uğramış H3N2 qrip virusu Türkiyədə də aşkarlanıb. 

Olaylar.az xəbər verir ki, yeni variantın ilk halları Diyarbakırda qeydə alınıb, yaxın həftələrdə isə virusun İstanbul, Ankara və İzmir kimi böyük şəhərlərə yayılacağı gözlənilir.

Mütəxəssislərin bildirdiyinə görə, mənşəyi Avstraliyaya gedib çıxan və ən azı 7 mutasiya keçirmiş H3N2 variantı mövsümə vaxtından əvvəl başlayaraq bir çox ölkədə yoluxma sayını qısa müddətdə ikiqat artırıb.

Ekspertlər bu qışın son 10 ilin ən ağır qrip mövsümlərindən biri ola biləcəyi barədə xəbərdarlıq edirlər.

Türkiyəli həkimlər hazırda böyük şəhərlərdə geniş yayılmış epidemiya olmadığını desələr də, Diyarbakırda erkən artımın virusun ölkəyə daxil olduğunu göstərdiyini vurğulayırlar. Havaların soyuması və qapalı məkanlarda qalma müddətinin artması ilə yoluxmaların sürətlə çoxalacağı bildirilir.

Mütəxəssislər qeyd edir ki, təhlükə təkcə H3N2 ilə məhdudlaşmır. Bu mövsüm RSV və rinovirus da eyni vaxtda aktivdir və xüsusilə uşaqlar, yaşlılar, xroniki xəstəliyi olanlar üçün risk yaradır. Yeni H3N2 variantı əvvəlki qriplə müqayisədə daha sürətlə yayılır, lakin əlamətlər əsasən dəyişmir: yüksək hərarət, halsızlıq, boğaz ağrısı, öskürək və əzələ ağrıları.

Həkimlər risk qruplarına daxil olan şəxslərə qrip əleyhinə peyvənd, gigiyena qaydalarına ciddi əməl etməyi və simptomlar ağırlaşdıqda dərhal həkimə müraciət etməyi tövsiyə edirlər.

Azərbaycanda vəziyyət necədir?

Hazırda Azərbaycanda mutasiyalı H3N2 qrip virusu ilə bağlı rəsmi təsdiqlənmiş yayılma xəbəri yoxdur.

Bu vaxta qədər yerli səhiyyə orqanları və xəbər mənbələri belə bir məlumat açıqlamayıb - yəni xüsusi olaraq mutasiyaya uğramış H3N2 qripinin Azərbaycanda yayılması barədə rəsmi təsdiqlənmiş xəbər yoxdur. (Musavat.com)