Tayland vətəndaşları Kamboca sərhədində blokadada qalıb – ÖZƏL

Olaylar.az xəbər verir ki, Thai PBS telekanalının məlumatına görə, 6 mindən çox Tayland vətəndaşı ötən cümə günündən bəri iki ölkə arasındakı davam edən silahlı sərhəd münaqişəsi səbəbindən Kamboca hakimiyyəti tərəfindən bağlanan Poipet sərhəd-buraxılış məntəqəsində (SBMM) qalır.
Vətəndaşlar Kambocanı tərk edərək Taylandın Aranapratet şəhərinə (Sakeo əyaləti) keçmək istəsələr də, Kamboca hakimiyyəti SBMM-ləri bağlayaraq onların geri qayıtmasına müvəqqəti icazə verməkdən imtina edir. Qeyd olunur ki, ötən həftə Tayland eyni məntəqədən 8 mindən çox Kamboca vətəndaşının ölkədən çıxışına şərait yaratmışdı.

Kamboca Senatının sədri və keçmiş baş nazir Hun Sen sosial şəbəkələrdə bildirib ki, sərhəd keçidlərinin və limanların bağlanması hər iki ölkə vətəndaşlarının təhlükəsizliyi ilə bağlıdır. O, Tayland vətəndaşlarının Pnompen və Siem Reap hava limanlarından müntəzəm reyslərlə təhlükəsiz hava yolu ilə evlərinə qayıda biləcəyini vurğulayıb.

SBMM-də qalanların əksəriyyəti Tayland qumarbazlarına hesablanmış kazinoların, gömrüksüz ticarət məntəqələrinin və otel infrastrukturunun fəaliyyət göstərdiyi Poipet Azad İqtisadi Zonasının (AİZ) işçiləridir. Taylandın təhlükəsizlik qüvvələrinin məlumatına görə, AİZ ərazisində həmçinin Çin mütəşəkkil cinayətkar qruplaşmalarının rəhbərliyi altında fəaliyyət göstərən və taylandlıları aldadaraq işləyən fırıldaqçı zəng mərkəzləri də yerləşir.