Vyetnam müharibə zamanı itkin düşmüş ABŞ əsgərlərinin qalıqlarını Vaşinqtona təhvil verib- ÖZƏL

Vyetnam müharibə dövründə itkin düşmüş Amerika Birləşmiş Ştatları hərbçilərinə aid olduğu ehtimal edilən qalıqları ABŞ tərəfinə təhvil verib. Olaylar.az xəbər verir ki, bu barədə Vyetnamın VnExpress xəbər portalı məlumat yayıb.
Hanoidəki Zalyam hərbi hava limanında keçirilən sayca 171-ci təhvil-təslim mərasimində Vyetnamın milli müdafiə nazirinin müavini Hoang Suan Çien, həmçinin Müdafiə Nazirliyinin itkin düşənlərin axtarışı üzrə idarəsinin əməkdaşları iştirak ediblər. ABŞ tərəfini isə ABŞ-ın Vyetnamdakı səfiri Mark Knapper və ABŞ Müdafiə Nazirliyinin Hərbi Əsir və Həlak Olanların Uçotu Agentliyinin direktoru Kelli Makkig rəhbərliyində nümayəndə heyəti təmsil edib.
Qalıqlar bu yaxınlarda Laokay əyalətində aparılan axtarış ekspedisiyası zamanı aşkar edilib. Vyetnamlı və amerikalı məhkəmə-tibbi ekspertlərin ilkin rəyinə əsasən, qalıqlar Vyetnam müharibəsi zamanı itkin düşmüş ABŞ əsgərlərinə aid ola bilər. Onlar əlavə ekspertiza və şəxsiyyətin dəqiqləşdirilməsi üçün ABŞ Silahlı Qüvvələrinin Havaydakı laboratoriyasına göndəriləcək.
ABŞ səfiri Mark Knapper Vyetnam hökumətinə humanitar repatriasiya təşəbbüsünə sadiqliyinə görə təşəkkür edərək, bu əməkdaşlığı Vaşinqton və Hanoy arasında münasibətlərin normallaşması və inkişafının əsas göstəricisi kimi qiymətləndirib. ABŞ və Vyetnam arasında itkin düşmüş amerikalıların axtarışı və qalıqlarının qaytarılması üzrə əməkdaşlıq 27 yanvar 1973-cü ildə imzalanmış Paris Sülh Sazişindən sonra başlayıb. Bu müddət ərzində Vyetnam ABŞ-a mindən çox qalıq dəsti təhvil verib və müharibə zamanı itkin düşmüş hesab olunan 1,9 min hərbçidən 730-dan çoxunun şəxsiyyətinin müəyyənləşdirilməsinə kömək edib.
Qeyd edək ki, ABŞ-ın Vyetnama qarşı apardığı müharibə illərində təxminən 3 milyon vyetnamlı həlak olub, 4 milyondan çox insan isə əlil qalıb və ya ABŞ ordusu tərəfindən istifadə olunan yüksək toksik kimyəvi maddələrdən zərər çəkib.