Ermənistan ombudsmanı kilsələrlə bağlı iddiaları araşdırır – ÖZƏL

Olaylar.az xəbər verir ki, Ermənistanın ombudsmanı Anaid Manasyan kilsələrə və din xadimlərinə qarşı Milli Təhlükəsizlik Xidmətinin (SNB) iddia olunan hərəkətləri ilə bağlı dövlət qurumlarına sorğular hazırlayır. O, jurnalistlərə açıqlamasında bildirib ki, SNB əməkdaşlarının Gümrüdəki keşişləri bazar liturgiyasında Katolikosun adını çəkməməyə məcbur etməsi və "Surb Yot Verk" kilsəsinin qapılarının möhürlənməsi barədə rəsmi izahat tələb edəcək.

Manasyanın sözlərinə görə, dini təşkilatlar müstəqil olmalıdır və bu müstəqillik dövlət tərəfindən təmin edilməlidir. Eyni zamanda o vurğulayıb ki, dini qurumlar siyasi proseslərə birbaşa müdaxilə etməməlidir.

Ombudsman qeyd edib ki, hüquq-mühafizə orqanları ictimai asayişi qorumalıdır, lakin ikili standartlara yol vermək olmaz. Manasyan bildirib ki, hüquq-mühafizə və güc strukturlarının iş metodikasının dəyişdirilməsi zərurəti barədə dəfələrlə xəbərdarlıq edib. Gümrü ilə bağlı siqnalları ötən həftədən aldıqlarını deyən ombudsman, vəziyyət tam aydınlaşdıqdan sonra mövzuya dair ətraflı şərh verəcəyini bildirib.