Gürcüstanın diplomatik mövqeyi: Rusiya ilə münasibətlərdə dəyişiklik gözlənilmir – ÖZƏL

Gürcüstan bu il Rusiya ilə diplomatik dialoqun qurulmasını və ya diplomatik münasibətlərin bərpasını nəzərdə tutmur. 

Olaylar.az xəbər verir ki, bu nəticələr Rusiya Elmlər Akademiyasının Dünya İqtisadiyyatı və Beynəlxalq Münasibətlər İnstitutunun (İMЭМО) hesabatında qeyd olunub.

"Hələ də rəsmi Tbilisinin baxışına görə, Abxaziya və Cənubi Osetiya problemlərinin həll olunmaması Gürcüstanın Rusiya ilə mövqeyini müəyyən edir," - deyə hesabatda bildirilir.

Sənəddə həmçinin vurğulanır ki, 2023-cü ildə Gürcüstan Avropa İttifaqına üzvlük üçün namizəd statusu əldə etsə də, yaxın zamanda üzvlük üzrə danışıqların başlaması gözlənilmir. Buna səbəb Avropa rəhbərliyinin Gürcüstan hökumətinin siyasətindən narazılığıdır. Gürcüstan həm antirusiya sanksiyalarına qoşulmaqdan imtina edib, həm də "xarici agentlər" haqqında qanun qəbul edib.

Bundan əvvəl Rusiyanın Xarici İşlər naziri Sergey Lavrov Moskvanın Gürcüstana, həmçinin Abxaziya və Cənubi Osetiyaya münasibətlərin normallaşdırılması istiqamətində dəstək göstərməyə hazır olduğunu bildirmişdi. Lakin bu prosesin uğuru ölkələrin öz maraqlarından asılı olacaq.

Qeyd edək ki, Gürcüstan 2022-ci ilin yazından etibarən öz siyasi kursunu qərbyönümlü mövqedən dəyişməyə başlayıb. 2024-cü ilin noyabrında Gürcüstanın baş naziri İrakli Kobaxidze ölkəsinin Avropa İttifaqına üzvlük müzakirələrini 2028-ci ilin sonuna qədər gündəmə gətirməyəcəyini açıq şəkildə bəyan etmişdi.