Zelenski NATO ilə bağlı müraciətlərinə ədalətsiz yanaşıldığını bildirib- ÖZƏL

Olaylar.az xəbər verir ki, Ukrayna prezidenti Vladimir Zelenski, Ukrayna-Şimali Avropa Sammitində çıxışı zamanı Qərbin Ukraynanın NATO-ya dəvət olunmaqla bağlı müraciətlərini yanlış anladığını qeyd edib. Zelenskinin sözlərinə görə, bəzi Qərb liderləri dəvət olunmaqla NATO üzvlüyü arasında fərqi görmürlər və bu məsələni üzvlük istəyinə aid edirlər.

Ukraynalı lider, dəvət və üzvlüyün fərqli məfhumlar olduğunu vurğulayıb və bəzi Qərb liderlərinin bu fərqi nəzərə almadığını bildirib. "Onlardan dəvət haqqında soruşurlar, amma onlar üzvlük barədə cavab verirlər. Bu, ədalətsizdir. Bu, sadəcə 'yox' deməyin bir yoludur," - deyə Zelenskinin mətbuat xidməti onun sözlərini sitat gətirib.

O, bu məsələnin Avropada, xüsusilə də Berlində daha ciddi şəkildə müzakirə edilməsini xahiş edib.

Xatırladaq ki, bir müddət əvvəl Almaniyanın kansleri Olaf Şolts, Zelenskinin "qələbə planı"ndakı Ukraynanın NATO-ya dəvət olunması ilə bağlı bəndi rədd edərək, hazırda Ukraynanın alyansa qəbul edilməsi qərarının verilməsinə ehtiyac olmadığını bildirmişdi.