“Vaşinqton Post” 200 mindən çox abunəçisini itirib - ÖZƏL

Olaylar.az xəbər verir ki, Amerikanın "Vaşinqton Post" qəzeti ABŞ prezident seçkilərində heç bir namizədi dəstəkləmək qərarına gəldikdən sonra 200 mindən çox abunəçi abunəliyini dayandırıb. 

Keçən bazar ertəsi günorta saatlarına qədər 200 mindən çox insan rəqəmsal abunəliyini ləğv edib. Bu ləğvlərin hamısı dərhal qüvvəyə minməsə də, bu rəqəm ümumi abunəçi sayının təxminən 8 faizini təşkil edir. Hazırda "Vaşinqton Post"un təxminən 2,5 milyon ödənişli abunəçisi var, o cümlədən çap versiyası olanlar da buraya daxildir.

Xatırladaq ki, keçən həftə "Vaşinqton Post" qəzetinin 1988-ci ildən bəri ilk dəfə ABŞ prezident seçkilərində heç bir namizədi dəstəkləməyəcəyini elan etdiyi bildirilmişdi. Bu qərara etiraz olaraq iki köşə yazarı və iki redaktor işdən ayrılıb.

Daha əvvəl, ABŞ prezidenti Co Baydenin prezident seçkilərində vaxtından əvvəl səs verdiyi barədə məlumat verilmişdi. ABŞ prezidenti digər vətəndaşlar kimi seçki məntəqəsinə gələrək növbəyə dayanıb səs verib.