Qulliver kimi... - Elçin Hüseynbəyli

Elçin Hüseynbəyli (“paralel dünyalar” silsiləsindən)

Elçin Hüseynbəyli

("paralel dünyalar" silsiləsindən)

...Xeyli yol getdik: Qurbanalı bağından Hacıyerinə qədər, yəni "Neftçilər" metrosundan  "İçəri şəhər"ə kimi. Yol qurtarmaq bilmirdi.

Meşənin ortasında başı göyə dirənən bir adama rast gəldik. Sanki Qulliuver idi. Başımızı qovzayıb ona baxdıq.

Xalıq:

-Ay aman! -deyə təəccübləndi, - elə bil nağıldayıq.

Qulliverin ayaqlarını özü boyda ağacın kötükləri qamarlamışdı, tərpənə bilmirdi.

-Kəsin o kötükləri, -deyə nəhəng adam bizə əmr elədi, - hər il kəsdirirəm, amma mozol kimi yenidən yaranır.

-Nə ilə kəsək? -deyə sual verdim.

-Əlini at, baltanıı götür, -dedi.

Əlimi boşluğa atdım və əlimə balta keçdi, onu götürdüm. Nə qədər kəssəm də xeyri olmadı. Kötüklər daha da artırdı.

O isə:

-Kəs, kəs! -deyə qışqırırdı, - onsuz da yenidən çıxacaqlar, məndən əl çəkən deyillər.

Bizim cəhdlərimiz əbəs idi.

Sonra o, nə elədisə ağac böyrü üstə yerə gəldi.

-Ən böyük dostumu itirdim, -deyə Qulliverə oxşayan adam ah çəkdi, - bir illiyə itirdim, -deyə əlavə elədi, -bir ildən sonra yenə mənə sarmaşacaq.

Biz məyus olduq.

-Sizə nə kömək edə biılrərm? -deyə o, bizdən soruşdi.

Mən ürəkləndim:

-Burda Günəş çox soyuq və zəifdir, meşə isə nəm, -dedim, - üşüyürük.

Qulliverə bənzər adam:

-Problem adamlardadır, onlar artdıqca hər şey azalır: su da, Günəş də, hava da. Ona görə də Günəşi tez-tez təzələmək lazımdır. Bu mənim vəzifələrimdən biridir, amma O, səxavətlə pul ayırmır. Adamlara inanmır. Ona görə də belə məsuliyyətli işləri mənə tapşırıb, -dedi və əlini yekə şalvarın cibinə atıb Günəş çıxardı, köhnə Günəşi fırladıb açdı, təzəsini yerinə bərkitdi.

-Ayı da dəyişmək lazımdır, -dedim, -gecə bizi ələ verə bilər, çox parlaqdır.

-Ayı dəyişə bilmərəm. Bu, mənim səlahiyyətimə aid deyil. Amma üzünə qara sürtərəm ki, çox parlamasın, -deyə Qulliver adam səsləndi.

-Sən ordan hər yeri görə bilirsən? - deyə Mətin soruşdu.

-Hər yeri? -deyə təəccüblə soruşdu, səsi xırıldadı. - Hər yeri necə görmək olar!? Bəlkə O...

-Deyirəm yəni Boz dağı görə bilirsən?

-Dedim axı, mənim xüsusi vəzifələrim var...

-Bəs onda?..

...

Bir-iki addım aralanmışdıq ki, Qullverə bənzər arxamızca dedi:

-Siz qarşıda başqa nağıl qəhrəmanlarını da görəcəksiniz. Onlardan qorxmayın. Hamısı mənim kimi vəzifə sahibidirlər. Bəlkə onların arasından sizə kömək edən tapıldı...

Fevral, 2019