Rektor Koreyanın Azərbaycandakı fövqəladə və səlahiyyətli səfiri ilə görüşdü
Yanvarın 22-də Azərbaycan Dillər Universitetinin rektoru akademik Kamal Abdulla Koreya Respublikasının Azərbaycandakı fövqəladə və səlahiyyətli səfiri Kim Tong Opla görüşüb.
Yanvarın 22-də Azərbaycan Dillər Universitetinin rektoru akademik Kamal Abdulla Koreya Respublikasının Azərbaycandakı fövqəladə və səlahiyyətli səfiri Kim Tong Opla görüşüb.
Olaylar.az bildirir ki, qonağı salamlayan rektor onu universitetdə görməkdən məmnun olduğunu bildirib. Universitetdə 20-ə yaxın dil və mədəniyyət mərkəzinin mövcudluğunu qeyd edən K.Abdulla Koreya mərkəzinin fəaliyyətindən söz açıb. Rektor K.Abdulla 54 tələbənin Koreya dilini öyrəndiklərini və bu sayın getdikcə daha da artacağını bildirib. Tələbələr arasında Koreya dilini, mədəniyyətini, tarixini öyrənməyə çox böyük potensial, istək və həvəs olduğunu deyən rektor Koreyada da Azərbaycan dilinə eyni münasibətin göstəriləcəyinə ümid etdiyini bildirib. Koreya Mədəniyyət Mərkəzinin Azərbaycan Dillər Universitetinin nəzdində təsis edilməsindən 25 il keçdiyni deyən K.Abdulla bu ildönümünün Ural-Altay nəzəriyyəsinin banilərinə həsr olunmuş tədbir şəklində qeyd olunmasının əhəmiyyətindən danışıb. Akademik K.Abdulla səfirlik və universitet arasındakı qədim tarixə malik əlaqələrin daha da genişlənəcəyi və birgə uğurların davamlı olacağına inamını ifadə edib. Akademik Koreyanın universitetlərindən birində Azərbaycan dili və mədəniyyəti mərkəzinin yaradılmasının əlaqələr çərçivəsində məqsədlərə doğru daha inamla irəliləməyə vasitə olacağını qeyd edib.
Koreyanın səfiri K.T.Op səmimi qəbula görə təşəkkürünü bildirib. Səfir qarşılıqlı əlaqələrin inkişaf etdirilməsində mühüm rol oynayan gənclərlə bağlı məsələlərin müzakirəsi üçün universitet rəhbərləri ilə görüşməyin vacibliyindən danışıb. Rektorun fikirləri ilə razı olduğunu deyən səfir ADU-da Koreya dilini öyrənən tələbələrin gələcək əməkdaşlığın dərinləşdirilməsində böyük işlər görəcəyinə əminliyini ifadə edib. Birgə tədbirlərin, layihələrin təşkilində maraqlı olduğunu deyən K.T.Op ADU-da Koreya guşəsinin təşkil olunacağını diqqətə çatdırıb.
ADU-nun Tədris işləri üzrə prorektoru professor Əfqan Abdullayev universitet haqqında statistik məlumatları diqqətə çatdırıb, fəaliyyət istiqamətindən bəhs edib.
