Ayətullah Xameneinin dəfninə 8 dövlət başçısı, 12 parlament sədri qatılıb, Avropa dövlətləri isə...

İranda ali dini lider Əli Xamenei ilə vida və dəfn mərasimləri davam edərkən, tədbirlərdə çoxsaylı xarici nümayəndə heyətlərinin iştirak etdiyi bildirilir.

Musavat.com-un xəbərinə əsasən, İran Xarici İşlər Nazirliyinin rəsmi nümayəndəsi İsmayıl Bəqayi açıqlamasında bildirib ki, vida mərasimində dünyanın təxminən 100 ölkəsindən rəsmi nümayəndələr, ictimai xadimlər və müxtəlif nümayəndə heyətləri iştirak edir.

Onun sözlərinə görə, mərasimdə prezident və ya baş nazir səviyyəsində azı səkkiz ölkənin nümayəndəsi, həmçinin 12 ölkənin parlament sədri iştirak edir. Bundan başqa, bir sıra dövlətlər xarici işlər nazirləri, digər nazirlər və xüsusi nümayəndələr göndəriblər.

Bəqayi qeyd edib ki, xüsusilə qonşu ölkələrdən yüksək səviyyəli nümayəndə heyətlərinin mərasimə qatılması gözlənilir. O, həmçinin müxtəlif ölkələrdən ictimai təşkilatların və tanınmış şəxslərin də vida mərasimində iştirak etdiyini bildirib.

Musavat.com xəbər verir ki, İran rəsmisinin sözlərinə görə, Şərqi Avropa ölkələrindən həm rəsmi, həm parlament, həm də ictimai nümayəndələr mərasimə qatılır. O əlavə edib ki, İranın iddiasına görə, İsrail və ABŞ-ın İrana qarşı hərbi əməliyyatlarını dəstəkləyən bəzi Avropa ölkələrinin nümayəndələri isə mərasimə dəvət edilməyiblər.

İran dövlət mediasının və rəsmi qurumların yaydığı məlumata əsasən, Xameneinin cənazəsi əvvəlcə Tehranda vida mərasimləri üçün xalqın ziyarətinə çıxarılıb. Daha sonra paytaxtda kütləvi dəfn yürüşü keçiriləcək, ardınca dini mərasimlər Qum şəhərində davam etdiriləcək. Son mərhələdə isə cənazə Xameneinin doğulduğu Məşhəd şəhərinə aparılacaq və burada dəfn olunacaq.

İran hakimiyyəti bildirir ki, ABŞ və İsrailin bu ilin fevralında həyata keçirdiyi hava zərbələri zamanı Xamenei ilə yanaşı, onun ailəsinin bir neçə üzvü də həlak olub. İran dövlət mediası onların arasında Xameneinin qızı, kürəkəni, gəlini və azyaşlı nəvəsinin də olduğunu açıqlayıb. Bu ailə üzvlərinin də cənazələrinin eyni vida mərasimləri çərçivəsində torpağa tapşırılması nəzərdə tutulur.